چودھری شجاعت حسین کی مولانا فضل الرحمان سے ملاقات ، اندرونی کہانی سامنے آگئی

ذرائع کے مطابق چودھری شجاعت اپوزیشن کو منانے کے لئے میدان میں آگئے،  چودھری شجاعت حسین  نے مولانا فضل الرحمان سے ملاقات کی ہے، ملاقات میں چودھری برادران اپوزیشن کا ساتھ دینے کے لئے اپنی شرائط سے بھی دستبردار ہوگئے ہیں ۔  

ذرائع کاکہنا ہے کہ چودھری شجاعت نے مولانا کو اپوزیشن کی پرانی پیشکش پر ہی اپوزیشن کے ساتھ تعاون کرنے پر رضامندی ظاہر کردی۔

ذرائع کا کہنا ہے کہ چودھری شجاعت  نے  مولانا  فضل الرحمٰن سے  درخواست  کی کہ  جن شرائط پر آپ پرویز الٰہی کو وزیراعلی بنانا چاہتے تھے، بنادیں، ہم تیار ہیں۔ جس کے جواب میں مولانا فضل الرحمان نے کہاکہ  چودھری صاحب! آپ نے بہت دیر کردی، آپ نے بروقت فیصلہ نہیں کیا، تو ہم نے دوسرے آپشنز پر کام کام کیا۔   مولانا نے چودھری شجاعت سے شکوہ  کیا کہ  آپ نے شہباز شریف کی دعوت قبول کرنے کے بعد اچانک انکار کر کے بھی اچھا نہیں کیا،  آپ ہمارے لئے محترم ہیں، آپ آئے ہیں، تو میں ن لیگ قیادت سے بات کروں گا۔ 

ذرائع کاکہنا ہے کہ  گزشتہ رات ملاقات کے بعد مولانا نے شہباز شریف سے ملاقات میں انہیں  چوہدری شجاعت کا پیغام پہنچادیا، شہباز شریف نے نواز شریف اور پارٹی سے مشاورت کے لئے وقت مانگ لیا ۔ 

 ذرائع کے مطابق  چودھری شجاعت آج شام پانچ بجے سابق صدر آصف زرداری سے بھی ملاقات کر کے انہیں  تعاون کی پیشکش کریں گے۔ 

یاد رہے کہ چودھری برادران کی سخت شرائط کے باعث اپوزیشن  نے ق لیگ سے مذاکرات ختم کر دیے تھے، ذرائع  کاکہنا ہے کہ چودھری برادران کی جانب شہباز شریف کی دعوت قبول کرنے سے انکار پر بھی اپوزیشن ق لیگ قیادت پر ناراض تھی ۔  چودھری برادران کے اس رویے کی وجہ سے آصف زرداری نے بلاول بھٹو کو چودھری برادران کے ناشتے پر گجرات جانے سے روک دیا تھا۔