شہبازشریف نے بجلی ، گھی کی قیمتوں میں اضافے کو وزیراعظم کا ایک اور یوٹرن قرار دیدیا 

تفصیلات کے مطابق پاکستان مسلم لیگ (ن) کے صدر اور قائد حزب اختلاف شہبازشریف  نے حکومت کی جانب سے بجلی ، گھی کی  قیمتوں میں ایک بار پھر اضافے پر حکومت پر تنقید کرتے ہوئے کہا کہ " کہا تھا کہ عمران نیازی بجلی اور اشیائے خوردونوش کی قیمتیں نہ بڑھانے کے اعلان پر یوٹرن نہ لیں لیکن انہوں نے روایت برقرار رکھی ، بجٹ تک بجلی اور اشیائے خوردونوش کی قیمتیں نہ بڑھانے کا عمران نیازی کا بیان قوم سے ایک اور جھوٹ اور دھوکہ ثابت ہوا ،  بجلی کی قیمت میں چھ روپے فی یونٹ ماہانہ اضافہ عوام کے خلاف غیرملکی سازش ہے جو پی ٹی آئی حکومت نے کی ہے ۔ 

شہبازشریف نے کہاکہ  58 ارب روپے کا اضافی بوجھ مہنگائی سے تباہ حال عوام پر ڈالنا ظلم، زیادتی اور سفاکی کی انتہاءہے ، یہ ہے وہ ظلم ہے جسے روکنے کے لئے تحریک عدم اعتماد لائے ہیں،  عوام دشمن ، جھوٹی حکومت سے نجات ہی قوم کو مہنگائی کے ظلم سے نجات دلائے گی ۔

 انہوں نے کہا کہ  آئی ایم ایف کو پاکستان کے معاشی مفادات کے ہاتھ کاٹ کر دے دئیے ،  بجلی، گھی کی قیمتوں میں اضافے سے عوامی ریلیف کے جھوٹ کا پول کھل چکا ہے  ، گھی کی فی کلو قیمت میں 15 روپے، خوردنی تیل کی فی لیٹر15 روپے ریلیف پیکج کا منہ چڑا رہا ہے ، گزشتہ ماہ خوردنی تیل 75 روپے فی لیٹر، گھی کی فی کلو قیمت 66 روپے تک اضافہ پہلے ہی کیا جاچکا ہے ۔ 

شہباز شریف نے مزید کہاکہ  بجٹ خسارہ ریکارڈ4.3 ٹریلین سے اوپر کی ہولناک سطح پر پہنچ گیا ہے، یہ معاشی تباہی کا کھلا ثبوت ہے  ، ملکی تاریخ کا سب سے بڑا بجٹ خسارہ ریونیو اور قومی آمدن میں اضافے کے حکومتی دعووں کو جھوٹ ثابت کررہا ہے ۔ 

ان کاکہنا تھا کہ تاریخ میں پہلی بار وفاقی حکومت بجٹ خسارے کا 318 ارب روپے کا اپنا ہدف بھی حاصل نہیں کرپائے گی،یہ جی ڈی پی کے 8 فیصد کے مساوی ہے ، اس خسارے کو پورا کرنے کے لئے مزید عالمی اور ملکی قرض لئے جائیں گے،  حقائق بتارہے ہیں کہ حکومت فیل ہوچکی ہے اور پاکستان کو فیل اور معاشی دیوالیہ کرنے پر تلی ہوئی ہے۔ 

واضح رہے کہ حکومت نے بجلی کی قیمتوں میں 5روپے 94 پیسے فی یونٹ  جبکہ گھی  کی قیمتوں میں 15 روپے تک کا اضافہ کیا ہے ۔ 

خیال رہے کہ 28 فروری کو وزیراعظم نے بجلی کی قیمت میں 5 روپے فی یونٹ کمی کا اعلان کیا تھا ۔ زیراعظم عمران خان نے کہا  تھا کہ آئندہ بجٹ تک پیٹرول ، ڈیزل اور بجلی کی قیمتوں میں کوئی اضافہ نہیں کریں گے بلکہ اس میں بتدریج کمی بھی کریں گے۔