ناظم جوکھیو قتل کیس،نامزد ملزم جام عبدالکریم پاکستان پہنچ گئے

کراچی: ناظم جوکھیو قتل کیس میں نامزد ملزم پیپلز پارٹی کے رکن قومی اسمبلی جام عبدالکریم پاکستان پہنچ گئے۔

نجی چینل ہم نیوز نے ذرائع کے حوالے سے بتایاکہ جام عبدالکریم کو تحریک عدم اعتماد میں ووٹ ڈالنے کے لیے پاکستان بلایا گیا ہے۔

جام عبدالکریم ناظم جوکھیو قتل کیس میں سندھ ہائیکورٹ سے 3اپریل تک حفاظتی ضمانت پر ہیں۔

نجی چینل کے مطابق ناظم جوکھیو کی بیوہ نے گزشتہ روز جام عبدالکریم سمیت تمام ملزمان کو معاف کرتے ہوئے کیس واپس لینے کا اعلان بھی کر دیا ہے۔

ویڈیو بیان میں ناظم جوکھیو کی بیوہ شیریں جوکھیو نے کہا کہ میں بہت مجبور ہوں، میرے گھر والوں نے میرا ساتھ چھوڑ دیا ہے، اپنے بچوں کی خاطر میں  سب ملزمان کو معاف کر رہی ہوں۔شیریں جوکھیو نے کہا ہے کہ میں نے فیصلہ اللہ تعالی پر چھوڑا ہے، جنہوں نے میرا ساتھ دیا میں ان کی شکر گزار ہوں ،سب کو بتانا چاہتی ہوں کہ میں مزید نہیں لڑسکتی۔