سلیکٹڈ حکومت کو ختم کیا اب نقصان کا ازالہ کرنا ہے: بلاول بھٹو زرداری

پاکستان پیپلز پارٹی کے چیئرمین بلاول بھٹو نے لندن میں مسلم لیگ (ن) کے قائد نواز شریف کی دعوتِ افطار میں شرکت کی ۔ دعوت افطار کے موقع پر نواز شریف اور بلاول بھٹو کے درمیان اہم ملکی و سیاسی امور پر تفصیلی بات چیت کی گئی ۔

 افطار کے بعد میڈیا سے گفتگو کرتے ہوئے پاکستان پیپلز پارٹی کے چیئر مین بلاول بھٹو زرداری کا کہنا تھا  کہ عمران خان جمہوریت کوکمزور کرنا چاہتے ہیں ، عمران خان نے ہماری معیشت ،ثقافتی پالیسی ، ہمارے ملک کو جو نقصان پہنچایا ہے وہ کوئی تصور بھی نہیں کرسکتا ہے ۔  

بلاول نے کہا کہ پاکستان کو بہت سے چیلنجز کا سامنا ہے، ہم سب کو احساس ہے کہ عمران خان تو چلے گئے، معیشت، جمہوریت، عالمی سطح پر پاکستان کو پہنچنے والا نقصان وہیں کا وہیں ہے ۔ اتحاد ی اور عبوری حکومت ملکی مسائل کو سنبھال سکتی ہے۔

بلاول بھٹو نے مزید کہا کہ میثاق جمہوریت کے ادھورے ایجنڈے کو مکمل کریں گے۔ 

واضح رہے کہ پاکستان پیپلز پارٹی کے چیئر مین بلاول بھٹو زرداری لندن میں قائد مسلم لیگ ن نوازشریف کی دعوت افطار پر ان کی رہائش گاہ پہنچے تھے۔  

افطار ڈنر میں چیئرمین بلاول بھٹو زرداری کے ہمراہ شیری رحمان، نوید قمر اور قمر زمان کائرہ نے بھی شرکت کی جبکہ اسحاق ڈار، حسین نواز اور حسن نواز سمیت شریف فیملی کے اہم افراد بھی افطار ڈنر میں شریک تھے۔