سندھ ہاؤس حملہ کیس : تحریک انصاف کے 2 ارکان اسمبلی گرفتار

اسلام آباد ہائی کورٹ کے جسٹس طارق محمود جہانگیری نے پی ٹی آئی کے ممبر قومی اسمبلی فہیم خان اور عطا اللہ کی درخواست ضمانت مسترد کردی۔

درخواست ضمانت مسترد ہونے کے بعد دونوں ارکان قومی اسمبلی کو گرفتار کرلیا گیا۔

یاد رہے گزشتہ ماہ تحریک انصاف کے کارکن اسلام آباد میں سندھ ہاؤس پر دھاوا بول کر اندر داخل ہوگئے تھے، انہوں نے ہاتھوں میں لوٹے اور ڈنڈے اٹھا رکھے تھے۔

احتجاج کے دوران پی ٹی آئی کے کارکنوں نے منحرف ارکان اسمبلی کے خلاف نعرے بازی کی اور سندھ ہاؤس کا مرکزی دروازہ ہی توڑ دیا۔

پولیس نے تحریک انصاف کے دو ارکان قومی اسمبلی فہیم خان اور عطاءاللہ نیازی سمیت 12افراد کو گرفتار کیا تھا جنہیں بعد ازاں شخصی ضمانت پر رہا کر دیا گیا تھا۔

بعد ازاں پولیس نے کار سرکار میں مداخلت، توڑ پھوڑ اور دفعہ 144 کی خلاف ورزی کا مقدمہ درج کیا تھا۔