مقدس مقام کے احترام کو ملحوظ نہ رکھنے پر پاکستانی گرفتار: سعودی سفارت خانہ

جدہ : پاکستان میں سعودی سفارت خانے کے ترجمان نے مدینہ منورہ میں گذشتہ رات ہونے والے واقعے کے بعد پاکستانی شہریوں کی گرفتاریوں کی تصدیق کی ہے۔
سعودی سفارت خانے کے ترجمان نے جمعے کو ایک بیان میں کہا ہے کہ ’ان میں سے کچھ پاکستانیوں کو قواعد کی خلاف ورزی اور مقدس مقام کے احترام کو ملحوظ نہ رکھنے پر گرفتار کیا ہے۔‘
واضح رہے کہ گزشتہ روز وزیراعظم شہباز شریف کے ساتھ سعودی عرب کے دورے پر جانے والے پاکستانی وفد کے ارکان کی مسجد نبوی میں حاضری کے دوران کچھ افراد نے سیاسی نعرے بازی کی تھی۔ سوشل میڈیا پر وائرل ویڈیوز میں دیکھا جا سکتا ہے کہ چند افراد نے وفد کے ارکان کے خلاف نعرے لگائے اور ان کی ویڈیوز بناتے رہے۔
دوسری جانب وفاقی وزیر داخلہ رانا ثنا اللہ نے کہا ہے کہ سعودی حکام سے درخواست کریں گے کہ ملوث افراد کی سی سی ٹی وی فوٹیجز ہمیں بھی بھیجیں تاکہ ان کی شناخت کی جائے اور قانونی کارروائی کریں۔
پاکستان کی وفاقی وزیر اطلاعات مریم اورنگزیب نے بھی مسجد نبوی میں نعرے بازے کی مذمت کرتے ہوئے کہا تھا کہ ’یہ معاشرے کی تباہی ہے۔‘
مدینہ میں میڈیا سے گفتگو میں تحریک انصاف کے سربراہ عمران خان پر تنقید کرتے ہوئے ان کا کہنا تھا کہ ’انہوں نے اس معاشرے میں جو تباہی کی وہ آج آپ کے سامنے ہے۔‘
’ہمارے کارکن بھی یہاں ہیں لیکن انہیں ہدایت کی گئی کہ ایسا رویہ نہ اپنایا جائے۔‘