خیبر پختونخوا حکومت نے کل سرکاری طور پر عید منانے کا اعلان کر دیا

تفصیلات کے مطابق خیبر پختونخوا حکومت نے کل سرکاری سطح پر عید الفطر منانے کا اعلان کر دیا ہے۔

صوبائی حکومت کے ترجمان بیرسٹر محمد علی سیف نے کہا ہے کہ خیبرپختونخوا کے مختلف علاقوں سے شوال المکرم کا چاند دیکھنے کی 130 شہادتیں موصول ہوئیں۔

کے پی کے حکومت نے پیر 2 مئی کو سرکاری طور پر عیدالفطر منانے کا فیصلہ کیا ہے، کل صوبے بھر میں عیدالفطر مذہبی جوش و جذبے سے منائی جائے گی۔

واضح رہے کہ اس سے قبل مرکزی رویت ہلاک کمیٹی کے چیئرمین مولانا عبدالخبیر آزاد نے اعلان کیا تھا کہ شوال 1443 کا چاند ملک بھر میں کہیں بھی نظر نہیں آیا، عید الفطر 3 مئی 2022ء بروز منگل کو ہوگی جبکہ اس سال رمضان المبارک کے 30 روزے مکمل ہوں گے۔

چیئرمین مرکزی رویت ہلال کمیٹی نے کہا پاکستان میں کسی بھی جگہ چاند نظر آنے کی کوئی شہادت موصول نہیں ہوئی، اکثر مقامات پر مطلع صاف تھا، کچھ مقامات پر ابر آلود بھی رہا، اتفاق رائے سے فیصلہ کیا گیا کہ عید الفطر 3 مئی کو ہوگی۔

اس سے قبل صوبہ پنجاب، سندھ اور بلوچستان کی زونل رویت ہلال کمیٹیوں نے بھی شوال کا چاند نظر نہ آنے کا اعلان کیا تھا، تاہم خیبرپختونخوا میں زونل رویت ہلال کمیٹی کے سربراہ عبدالرؤف مدنی نے بتایا تھا کہ شوال کے چاند کی شہادتیں موصول ہوئی ہیں، شرعی حیثیت جانچنے کے بعد مرکزی رویت ہلال کمیٹی کو آگاہ کیا جائے گا۔