پی ٹی آئی قیادت کے خلاف توہین مذہب کے مقدمات چیلنج

پی ٹی آئی قیادت کے خلاف درج توہین مذہب کے مقدمات اسلام آباد ہائیکورٹ میں چیلنج کر دیے گئے۔

سابق وفاقی وزیر فواد چودھری کی جانب سے اسلام آباد ہائی کورٹ میں درخواست دائر کر دی گئی۔اسسٹنٹ رجسٹرار ہائی کورٹ اسد خان کی جانب سے درخواست وصولی کی تصدیق کی گئی ہے۔

درخواست میں موقف اپنایا گیا ہے کہ مجھے اور مقدمات میں نامزد ساتھیوں کو ہراساں کرنے سے روکا جائے۔ملک بھر میں درج مقدمات کو ریکارڈ پر لانے کی ہدایت کی جائے۔

درخواست میں کہا گیاہے کہ پٹشنرز اور اس کے ساتھیوں کے بنیادی حقوق کی خلاف ورزی سے روکا جائے۔کس بنیاد پر مقدمات دائر کیے گئے وجوہات سے آگاہ کیا جائے۔

درخواست میں استدعا کی گئی ہے کہ ایف آئی اے یا پولیس کا کوئی بھی ایکشن غیر قانونی قرار دے کر کالعدم قرار دیا جائے۔پی ٹی آئی لیگل ٹیم ایڈوکیٹ فیصل فرید اور ایڈوکیٹ علی بخاری نے درخواست دائر کی۔

واضح رہےکہ مسجد نبوی ﷺ واقعے کے خلاف فیصل آباد میں عمران خان سمیت 150 افراد کے خلاف مقدمہ درج کیا گیا تھا۔فواد چودھری، شہباز گل، شیخ رشید، قاسم سوری، راشد شفیق اور انیل مسرت کو بھی مقدمے میں نامزد  کیا گیا ہے۔