منشیات برآمدگی کیس :وزیرداخلہ رانا ثنا اللہ25 جون کو فردجرم کیلئے عدالت طلب 

تفصیلات کے مطابق وفاقی  وزیر داخلہ رانا ثناء اللہ کے خلاف منشیات برآمدگی کیس میں بڑی پیشرفت سامنے آئی ہے ،  عدالت نے رانا ثناءاللہ کو فرد جرم عائد کرنے کے لیے طلب کرتے ہوئے  25 جون کو کیس سماعت کے لیے مقرر کردیا۔

عدالت نے گزشتہ سماعت کا تحریری حکم نامہ جاری کردیا ہے جس کے تحت عدالت نے رانا ثناء اللہ کی پراپرٹی اور بینک اکاؤنٹس کھولنے کی درخواست پر اے این ایف سے جواب طلب کرلیا ہے ، رانا ثناء اللہ کی حاضری سے مستقل معذرت کی درخواست پر وکلاء آئندہ دلائل دیں۔

تحریری حکم نامے میں مزید کہا گیا ہے کہ رانا ثناء اللہ کے شریک ملزمان نے فرد جرم عائد نہ کرنے کی درخواستوں کو واپس لیا، عدالت نے درخواستوں کو واپس لینے کی بنیاد پر مسترد کردیا۔

رانا ثناء اللہ کی عدم حاضری پر ان کے وکیل نے موقف دیا کہ وفاقی وزیر داخلہ ہونے کے باعث انہیں اسلام آباد میں جلدی جانا ہے اس لیے وہ پیش نہیں ہوسکے۔

واضح رہے کہ رانا ثناء اللہ کے خلاف اے این ایف حکام نے 15 کلو منشیات برآمدگی کا چالان جمع کروا رکھا ہے۔

واضح رہے کہ پاکستان مسلم لیگ (ن)  رہنما  رانا ثنا اللہ کو انسداد منشیات فورس نے یکم جولائی 2019 کو  سیکھکی کے نزدیک اسلام آباد-لاہور موٹروے  سے گرفتار کیا تھا۔ رانا ثنا کا موقف ہے کہ  ان کے خلاف جھوٹا مقدمہ درج کیا گیا جبکہ منشیات برآمدگی کے ثبوت بھی عدالت میں پیش نہیں کیے گئے۔

اے این ایف حکام کے مطابق رانا ثنا اللہ کی گاڑی سے منشیات کی بھاری مقدار برآمد ہوئی اور کے خلاف نارکوٹکس ایکٹ کے تحت مقدمہ درج کیا گیا۔ انسداد منشیات فورس کے ذرائع کے مطابق منشیات کے اسمگلر نے تفتیش میں ن لیگی رہنما کا نام لیا تھا۔