کابینہ اراکین ، سرکاری افسران کے پٹرول، بجلی اور گیس کوٹے میں کٹوتی کی تجویز

حکومتی ذرائع  کے مطابق تمام وزارتوں کے سرکاری افسران کے پیٹرول کوٹے میں بھی کمی کا فیصلہ کیا گیا ہے، سرکاری افسران کے پیٹرول کوٹے میں 30 سے 40 فیصد کمی ہوگی۔

حکومتی ذرائع کا کہنا ہے کہ کابینہ اراکین اور سرکاری افسران کے بجلی، گیس اور ٹیلی فون بل کے کوٹے پر بھی کٹ لگانے کی تجویز دی گئی ہے۔

حکومتی ذرائع کے مطابق تمام وزارتوں میں تزئین و آرائش پر بھی پابندی کی تجویز زیر غور ہے، وزارتوں کے افسران کے لئے نئی گاڑیاں لینے کے معاملے پر بھی پابندی سے متعلق غور کیا جا رہا ہے۔

دوسری جانب  پنجاب حکومت  نے تمام وزرا کا پیٹرول کوٹہ ختم کرنے کا اعلان کیاہے ، اس حوالے سے مسلم  لیگ ن کے رہنماعطا تارڑ کا کہنا ہے کہ پنجاب میں وزرا کے سرکاری پیٹرول پر پابندی عائد کردی گئی ہے۔

صوبائی وزیرعطا تارڑ نے بتایا کہ پنجاب میں وزیروں پرسرکاری پیسے سے پیٹرول کےاستعمال پرپابندی لگادی گئی ہے ۔ کوئی بھی وزیر سرکاری پیٹرول نہیں لے گا ۔  تمام وزرا ذاتی خرچ پر پیٹرول ڈلوائیں گے۔ سرکاری کام کے لیے جانے والے وزرا بھی ذاتی خرچ پرپیٹرول ڈلوائیں گے۔