سیلاب زدگان کیلئے یواین ایچ سی آر کی جانب سے امدادی سامان لیکر مزید دو پروازیں کراچی پہنچ گئیں

دفتر خارجہ کے مطابق ان پروازوں میں آنے والے امدادی سامان میں سیلاب متاثرین کے لیے خیمے اور دیگر امدادی اشیاء شامل ہیں۔ 

ہوائی اڈے پر متحدہ عرب امارات کے قونصلیٹ، یو این ایچ سی آر اور وزارت خارجہ کے نمائندوں نے پروازوں کا استقبال کیا۔

ترجمان نے کہا کہ ہم پاکستان میں سیلاب سے متاثرہ افراد کے لیے اقوام متحدہ کے پناہ گزینوں کے ادارے کی جانب سے انسانی امداد کا خیرمقدم کرتے ہیں۔

واضح رہے کہ ملک کے ہولناک سیلاب زدگان کے لئے دنیا کے مختلف ممالک اور عالمی اداروں کی جانب سے امدادی پروازوں کی پاکستان آمد کا سلسلہ جاری ہے، اب تک 44 پروازیں متاثرین کے لئے امدادی سامان لیکر پاکستان پہنچ چکی ہیں۔