فیفا ورلڈ کپ 2022 : پاک  فوج کا دستہ سیکیورٹی سنبھالنے کیلئے قطر روانہ

تفصیلات کے مطابق پاک فوج کا سیکیورٹی دستہ فیفا ورلڈ کپ 2022کی سیکیورٹی سنبھالنے کیلئے نور خان ائیر بیس سے قطر روانہ ہوگیا، دستہ پاک فوج کے آفیسرز، جونئیر کمیشنڈ آفیسرز اور جوانوں پر مشتمل ہے۔

پاکستانی فوج کے افسران فیفا ورلڈ کپ 2022 کے میچز کے دوران قطر حکومت کو سکیورٹی میں معاونت فراہم کریں گے۔

اس حوالے سے ستمبر میں قطر کی آٹھ رکنی ٹیم نے پاکستان کا دورہ بھی کیا تھا۔

پاکستان آرمی کے سپیشل دستے نے فیفا کے ارکان کو سکیورٹی سے متعلق تربیت فراہم کی تھی۔

قطر حکومت کی جانب سے پاکستان سے درخواست کی گئی تھی کہ ورلڈ کپ کے دوران سکیورٹی کے لیے اس کی مدد کی جائے اور اگست میں قطری وزارت داخلہ کے چار رکنی وفد نے پاکستان کا دورہ بھی کیا تھا۔

واضح رہے کہ  ایک ماہ قبل وفاقی کابینہ نے فیفا ورلڈ کپ 2022ء کی سیکیورٹی کے لیے قطر اور پاک فوج کے درمیان معاہدے کی منظوری دی تھی۔

فیفا ورلڈ کپ 21 نومبر سے 18 دسمبر 2022ء تک قطر میں کھیلا جائے گا۔