وزیراعظم شہباز شریف کانفرنس آف پارٹیز 27 کے نائب صدر مقرر

وزیراعظم شہباز شریف کانفرنس آف پارٹیز (سی۔او۔پی۔27) کے اجلاس کی ناروے کے وزیراعظم ، مصر کے صدر کے ہمراہ مشترکہ صدارت کریں گے ،  یہ اجلاس شرم الشیخ، مصر میں 6 سے 18 نومبر کو ہوگا۔

اقوام متحدہ کے 195 ممالک میں سے پاکستان کے وزیراعظم کو اس منصب کے لئے منتخب کیا جانا بہت بڑا عالمی اعزاز ہے ۔

 واضح رہے کہ اس وقت  ’’ سی۔او۔پی۔27 ‘‘ کی صدارت مصر کے پاس ہے،  مصر کے صدر عبدالفتاح السیسی نے وزیراعظم شہباز شریف کو “سی۔او۔پی۔27” اجلاس کی مشترکہ صدارت کی دعوت دی ہے۔

اجلاس میں عالمی سربراہان، حکومتوں کے سربراہ، عالمی مالیاتی اداروں اور تھنک ٹینکس کے ذمہ دار شرکت کریں گے ۔  اقوام متحدہ کے زیر اہتمام ماحولیاتی تبدیلیوں کے مسائل اور ان کے حل کے حوالے سے یہ 27 واں اجلاس ہوگا ۔

وزیراعظم شہباز شریف کی ماحولیاتی تبدیلیوں کے حوالے سے پراثر آواز پر انہیں یہ منصب دیا گیا۔

حالیہ سیلاب کے بعد وزیراعظم شہباز شریف نے شنگھائی تعاون تنظیم (ایس۔سی۔او) کے سربراہان مملکت و حکومت کی کونسل اور اقوام متحدہ کی جنرل اسمبلی کے 77 ویں اجلاس میں ماحولیاتی تبدیلیوں پر موثر آواز اٹھائی تھی ۔

 ماحولیاتی تبدیلیوں کے مسئلہ کو ’’ایس۔سی۔او‘‘تنظیم کی سطح پر اٹھانے کی وزیراعظم شہباز شریف کی تجویز کی دیگر ممالک نے تائید کی تھی ۔

شنگھائی تعاون تنظیم کے سربراہان مملکت اور حکومت کی کونسل کا اجلاس 15 سے 16 ستمبر کو سمر قند میں ہوا تھا۔