قومی اسمبلی میں دو جیالوں کا اضافہ باعث اطمینان ہے : آصف علی زرداری

تفصیلات کے مطابق سابق صدر آصف علی زرداری نے کہا  کہ تیر کا نشان فتح کا نشان ہے شاباش جیالو شاباش، ملتان والوں نے سیاسی خانہ بدوش سے حساب برابر کردیا ہے۔

انہوں نے کہا کہ ملتان اور ملیر کے عوام کا شکریہ ، جیالے قابل فخر ہیں، جنوبی پنجاب صوبہ بن کر رہے گا یہ میرا وعدہ اور بلاول بھٹو کا منشور ہے ،ملتان اور ملیر میں جیت جیالوں کے نام ہے ان کا کوئی مقابلہ نہیں۔

انہوں نے کہا کہ قومی اسمبلی میں دو جیالوں کا اضافہ باعث اطمینان ہے۔

دوسری جانب وزیرخارجہ ، پاکستان پیپلز پارٹی (پی پی پی) کے چیئرمین بلاول بھٹو زرداری نے بھی  کراچی اور ملتان میں اپنی پارٹی کے امیدواروں کی فتح کے بعد پی ٹی آئی کو واضح پیغام دے دیا ۔

بلاول بھٹو زرداری نے کہا کہ 2018 میں چوری کی گئی نشستوں پر عمران خان کو شکست دینے پر مبارک باد پیش کرتا ہوں،  عمران خان کو شکست دینے پر بھائی موسیٰ گیلانی اور عبدالحکیم بلوچ کو مبارک باد دیتا ہوں۔

واضح رہے گزشتہ روز کے ضمنی انتخابات میں این اے 237 ملیر کراچی سے پیپلز پارٹی کےعبدالحکیم بلوچ 32567 ووٹ لیکر کامیاب ہوئے جبکہ این اے 157 ملتان سے پیپلز پارٹی کے علی موسیٰ گیلانی نے پاکستان تحریک انصاف کی مہربانو قریشی کو شکست دی۔