ایک آدمی نے ہماری حکومت کو گرانے کیلئے ملک دشمنی کی ہے : عمران خان

تفصیلات کے مطابق پی ٹی آئی چیئرمین  عمران خان  نے لاہور میں کارکنوں سے بذریعہ ویڈیو لنک خطاب  کرتے ہوئے  کہا کہ لوگوں میں امید ختم ہورہی ہے،  اس ملک میں قانون کی حکمرانی نہیں ہے ، ہم تباہی کی طرف جا رہے ہیں ، میں اداروں سے پوچھتا ہوں کہ آپ کو ملک کی فکر ہے یا نہیں ہے، ہمارا ملک دلدل میں پھنستا جارہا ہے، جتنی جلدی الیکشن کروائیں گے اتنی جلدی ملک کو اس دلدل سے نکلنے کا موقع ملے گا،  70 فیصد پاکستانی کہتے ہیں مسائل کا حل صاف شفاف الیکشن ہیں۔

عمران خان نے کہا کہ 70 سال میں قوم کو اس طرح اندھیرے میں جاتے نہیں دیکھا، ہماری دو صوبوں میں حکومت ہے، 66 فیصد حصے میں حکومت ہے، جو حکومت گرائی گئی اس کے دور میں سب سے زیادہ گروتھ ریٹ تھا، اس حکومت کو ایک آدمی نے گرایا۔

انہوں نے کہا کہ ایک آدمی فیصلہ کر بیٹھا تھا کہ اس پارٹی کو ختم کرنا ہے، ایک آدمی فیصلہ کر بیٹھا تھا کہ عمران خان کو ختم کرنا ہے، نا اہل کرنا ہے، دھاندلی کے باوجود ضمنی الیکشن جیت رہے تھے، پھر فیصلہ کیا گیا کہ مجھے مار کر ہٹایا جائے، ہم سے ایسے دشمنی کی گئی جیسے ہم غدار ہیں۔

ہی ٹی آئی چئیرمین  نے کہا کہ ہم اپنی دو حکومتوں میں الیکشن کروانے کو تیار ہیں، ہمارا آئینی حق ہے کہ ہم الیکشن کروائیں، پنجاب میں مذاق ہورہا ہے،اگر خیبرپختونخوا میں پولیسنگ پر پیسے خرچ نہ کیے گئے تو حالات اور گھمبیر ہونگے۔ 

عمران خان نے کہا کہ ٹیکس کلیکشن کم ہوتی جا رہی ہے، ہمارے دور میں کورونا کے باوجود انڈسٹری اوپر آرہی تھی، ٹیکسٹائل انڈسٹری کی وجہ سے ایکسپورٹ بڑھیں، آج فیکٹریاں بند ہو رہی ہیں، مزدور بے روزگار ہو رہے ہیں،  ڈالر کم آ رہے ہیں، قرضے بڑھتے جا رہے ہیں، خوف ہے کہ قرضوں کی قسطیں ادا کرنے کیلئے ڈالر نہیں، کسی طبقے کو روشنی نظر نہیں آ رہی، امید ختم ہوگئی ہے۔

چیئرمین پی ٹی آئی نے مزید کہا کہ آج دہشتگردی بڑھتی جا رہی ہے جبکہ ہمارے دور میں افغانستان کے ساتھ تعلقات اچھے تھے،  اب کدھر ہے ہماری خارجہ پالیسی ؟ وزیر خارجہ بلاول بھٹو پونے 2 ارب روپے بیرون ملک دوروں پر خرچ کر چکے ہیں انہوں نے پوری دنیا گھوم لیا مگر افغانستان نہیں گئے،  سب سے زیادہ ضرورت افغانستان سے تعلقات بہتر کرنے کی ہے۔

انہوں نے کہا کہ آج پاکستان میں صرف قانون کی حکمرانی کا ہی مسئلہ ہے اور جب تک ہم یہ جنگ نہیں لڑیں گے ہمارے ملک کا کوئی مستقبل نہیں ، ہم انصاف قائم نہ کر کے تباہی کی طرف جا رہے ہیں۔