کراچی کا مئیر کون؟ کوئی بھی پارٹی گولڈن نمبر حاصل نہ کرسکی

کراچی میں تیر کی پرواز بلند رہی لیکن سادہ اکثریت کے ہدف تک نہ پہنچ سکی۔ میئر کی کرسی پانے کے لئے تین بڑی جماعتوں میں سے دو کو ایک دوسرے سے ہاتھ ملانا ہوں گے۔

پیپلزپارٹی اور تحریک انصاف نے جماعت اسلامی سے باضابطہ رابطے کا اعلان کردیا ہے۔ سعید غنی نے کہا تحریک انصاف کے ساتھ نہیں جائیں گے۔ جماعت اسلامی پہلی پارٹی ہوگی جس سے حکومت سازی پر بات کریں گے۔ علی زیدی کا کہنا ہے کہ حافظ نعیم الرحمان سے ملاقات کے بعد آئندہ کا لائحہ عمل بنائیں گے۔

واضح رہے کراچی کے میئر کے لئے کوئی بھی جماعت ایک سو چوبیس کا گولڈن نمبر حاصل نہیں کر سکی ہے۔ پیپلزپارٹی ترانوے سیٹوں کے ساتھ سب سے آگے رہی۔

جماعت اسلامی نے چھیاسی جبکہ تحریک انصاف نے چالیس نشستیں جیتیں۔ ن لیگ کے سات، جے یو آئی کے تین اور ٹی ایل پی کے دو امیدوار کامیاب ہوئے۔ تین نشستوں پر آزاد امیدواروں نے میدان مارا۔ گیارہ نشستوں پر امیدواروں کی موت کے باعث الیکشن نہیں ہوئے۔