الیکشن کیس ،وزیراعظم نے وفاقی کابینہ کا ہنگامی اجلاس طلب کر لیا

تفصیلات کے مطابق وزیراعظم نے ایک نکاتی ایجنڈے پروفاقی کابینہ کا اجلاس آج رات کو طلب کرلیا ہے، اور وزراء کو اجلاس میں شرکت یقینی بنانے کی ہدایت کی گئی ہے۔

وزیر اعظم نے ہدایت کی ہے کہ جو وزراءنہیں آسکتے وہ ویڈیولنک کےذریعےحاضر ہوں۔اجلاس میں آئینی اورقانونی معاملات کےآپشنزپرغور کیا جائے گا۔

خیال رہے سپریم کورٹ نے آج پنجاب اور خیبرپختونخوا میں انتخابات سے متعلق کیس کا فیصلہ محفوظ کرلیا ہے، جو کہ کل سنایا جائے گا۔

دوران سماعت چیف جسٹس نے کہا کہ ایسے حالات بھی ہوسکتے ہیں جب انتخابات ملتوی کیے جاسکیں، وفاقی حکومت نے ایسا کوئی مواد نہیں دیا جس پرالیکشن ملتوی ہوسکیں، اصل مسئلہ سیکیورٹی ایشو ہے۔

عدالت عظمیٰ نے سیکریٹری دفاع کو رپورٹ جمع کرانے کیلئے کل تک مہلت دے دی۔ چیف جسٹس نے کہا کہ کیا الیکشن کمیشن کو جنگ لڑنے والے اہلکار درکار ہیں، سوال یہ ہے 8 اکتوبر کو کیسے سب ٹھیک ہوجائے گا؟، فوج مصروف ہے تو نیوی اور ایئر فورس سے مدد لی جاسکتی ہے۔

سیکریٹری خزانہ کی رپورٹ پر جسٹس عمر عطاء بندیال نے کہا کہ پیٹرولیم مصنوعات پر حکومت کو 157 ارب روپے خسارہ تھا، وہ 177 ارب ہوجاتا تو کیا ہوجاتا۔

چیف جسٹس نے سیاسی جماعتوں کو ہدایت کی ہے کہ اگر عدالتی کارروائی کا بائیکاٹ نہیں کیا تو لکھ کر دیں۔ جسٹس منیب اختر نے ریمارکس دیئے کہ ایک طرف بینچ پراعتراض کرتے ہیں پھر کارروائی کا حصہ بھی بنتے ہیں۔