عام انتخابات ، سپریم کورٹ کے فیصلے کے بعد الیکشن کمیشن  کا  مشاورتی اجلاس

پنجاب میں عام انتخابات کے معاملہ پر سپریم کورٹ کے فیصلے کے بعد الیکشن کمیشن  نے بھی  مشاورتی اجلاس طلب کیا۔اجلاس کی صدارت چیف الیکشن کمشنر سکندر سلطان راجا نے کی، اجلاس میں سپریم کورٹ کے فیصلے کے تناظر میں اہم فیصلے  کیے گئے۔ الیکشن کمیشن نے سپریم کورٹ احکامات کے مطابق الیکشن کرانے کیلئے لائحہ عمل طےکیا۔ 

الیکشن کمیشن کی جانب سے متعلقہ ونگز کو پنجاب میں انتخابات کے حوالے سے تیاریاں تیز کرنے کی ہدایت کی گئی۔الیکشن کمیشن نےجلد فنڈز اور دیگر متعلقہ امور کے لیے وفاقی حکومت سے رابطہ کرنے کا فیصلہ کیا ہے۔ 

واضح رہے کہ گزشتہ روز سپریم کورٹ آف پاکستان نے پنجاب اور خیبرپختونخوا انتخابات التوا کیس کا محفوظ فیصلہ سناتے ہوئے الیکشن کمیشن کا 22 مارچ کا شیڈول کالعدم قرار دے دیا  تھا۔ وفاقی حکومت کو پنجاب اور خیبرپختونخوا انتخابات کے لیے 20 ارب روپے جاری کرنے کا حکم بھی جاری کردیا گیا تھا۔ الیکشن کمیشن نے 22 مارچ کو پنجاب انتخابات  کے شیڈول کو ملتوی کرتے ہوئے 8 اکتوبر کو الیکشن کرانے کا اعلان کیا تھا جسے سپریم کورٹ نے گزشتہ روز  کالعدم قرار دےد یا گیا تھا۔