بھارت میں کورونا بے قابو ، ٹی ٹوئنٹی ورلڈ کپ کا انعقاد ایک چیلنج بن گیا

ذرائع کے مطابق  آئی سی سی کی جانب سے  بھارت میں کووڈ 19کے بڑھتے ہوئے کیسز پر انتہائی تشویش کا اظہار  کیا جا رہا ہے، جس پر  انٹرنیشنل کرکٹ کونسل کا کوویڈ 19 کی صورتحال  کا بغور جائزہ لینے کا فیصلہ کر لیا۔

ٹی ٹوئنٹی ورلڈ کپ کے انعقاد کے لیے آئی سی سی مکمل تسلی کرنے کی خواہشمند ہے کیونکہ عالمی گورننگ باڈی کا ماننا ہے کہ ٹیموں اور  براڈ کاسٹرز سمیت دیگر متعلقہ افراد کی صحت اور حفاظت کو خطرے میں نہیں ڈالا جا سکتا۔

آئی سی سی کا وفد اگلے چند روز میں بھارت کا دورہ کرے گا لیکن وفد کے لیے موجودہ صورتحال میں بھارت جانا بھی ایک چیلنج قرار دیا جا رہا ہے۔

آئی سی سی نے ورلڈ کپ کے لیے بھارت کے 9 مجوزہ وینیوز کا بھی جائزہ لینا ہے، آئی سی سی جائزہ لینے کے بعد وینیوز کا حتمی فیصلہ کرے گا۔

خیال رہے کہ آئی سی سی ٹی ٹوئنٹی ورلڈ کپ اکتوبر نومبر میں بھارت میں کھیلا جانا ہے۔