سمندری طوفان بپرجوئے: کیٹی بندر میں پانی کی سطح میں اضافہ جاری

کراچی: سمندری طوفان بپرجوئے کے پیش نظر کیٹی بندر میں پانی کی سطح میں مسلسل اضافہ، کھارو چن کے متعدد دیہات زیر آب آگئے۔

تفصیلات کے مطابق بدین کے ساحلی علاقوں میں پانی ماہی گیروں کی بستی کے قریب آگیا، کراچی کے علاقے ابراہیم حیدری میں پانی کی سطح کئی فٹ تک بلند ہوگئی جب کہ ٹھٹھہ، سجاول اور بدین کے ساحلی علاقوں میں بارش اور تیز ہواؤں کے باعث ہائی ٹرانسمیشن لائن کے کھمبے گر گئے جس سے کئی علاقوں میں بجلی کی فراہمی معطل ہوگئی۔

دوسری جانب طوفان کی آمد سے قبل کیٹی بندر شہر کو خالی کرالیا گیا جب کہ بدین، سجاول کے ساحلی علاقوں سے بھی انخلاء شروع کردیا گیا۔

محکمہ موسمیات کے مطابق آج (بدھ) صبح 10 بجے سے دوپہر 12 بجے تک کا وقت سجاول کی طرح انتہائی پرخطر ہے۔ جاتی، کھارو چن اور شاہ بندر کے علاقے خطرے کی زد میں ہیں۔

سندھ کے وزیر اطلاعات شرجیل انعام میمن نے بتایا کہ سندھ کی ساحلی پٹی سے 22 ہزار 260 افراد کو محفوظ مقامات پر منتقل کیا گیا ہے۔