سمندری طوفان بپر جوائے کل دن 11 بجے پاکستان میں داخل ہوگا،کیٹی بندر سے ٹکرائے گا

 وفاقی وزیر موسمیاتی تبدیلی شیری رحمان نے چیئرمین این ڈی ایم اے کے ہمراہ مشترکہ پریس کانفرنس سے خطاب کرتے ہوئے کہا کہ طوفان بائپر جوائے سات کلو میٹر فی گھنٹہ کی رفتار سے بڑھ رہا ہے۔

انہوں نے کہا موسمیاتی تبدیلی کی وجہ سے طوفان آ رہا ہے، پاکستان موسمیاتی تبدیلی کا ہاٹ سپاٹ بن چکا ہے، یہ قدرتی حالات نہیں ہیں بلکہ موسمیاتی تبدیلی کا اثر ہے اور ترقی یافتہ ممالک کی سرگرمیوں کا نتیجہ ہے۔

این ڈی ایم اے کے مطابق سمندری طوفان کیٹی بندر سے 300 کلومیٹر جنوب مغرب، کراچی سے 350 جب کہ ٹھٹھہ سے 360 کلومیٹر جنوب میں موجود ہے۔

اس حوالے سے سماجی رابطوں کی ویب سائٹ ’ٹوئٹر‘ پر جاری کردہ بیان میں این ڈی ایم اے کی جانب سے کہا گیا ہے کہ طوفان شمال کی جانب رہنے کے بعد 15 جون بعد از دوپہر شمال مشرق کی جانب رخ کرتے ہوئے کیٹی بندر و انڈین ریاست گجرات سے گزرے گا۔

این ڈی ایم اے نے سمندری طوفان کے ممکنہ اثرات سے محفوظ رہنے کے لیے ساحلی علاقوں میں رہنے والے افراد کو انتظامیہ کی جانب سے دی جانے والی ہدایات پر عمل کرنے کی ہدایت بھی کی ہے۔