کراچی مئیر شپ کے الیکشن کے خلاف جماعت اسلامی کا عدالت جانے کا اعلان

امیر جماعت اسلامی پاکستان سراج الحق نے کہا ہے کہ کراچی کے مینڈیٹ پر شب خون مارا گیا، کراچی کے مینڈیٹ کے تحفظ کےلیے عدالت جائیں گے، پُرامن احتجاج کریں گے۔ 

لاہور سے جاری اپنے بیان میں امیر جماعت اسلامی نے مزید کہا کہ کراچی شہر کو ایک شہزادے کی خواہش کے مطابق نہیں چلایا جاسکتا۔

پیپلز پارٹی اندرون سندھ پر توجہ دے جو موہنجوداڑو کا منظر پیش کر رہا ہے۔

۔سراج الحق نے کہا کہ کراچی کے میئر کے انتخاب کا دن شہر کی تاریخ کا سیاہ ترین دن تھا، الیکشن کمیشن اپنی ذمہ داری پوری کرنے میں مکمل ناکام ہوگیا۔

میئر کے انتخاب کے دوران 31 منتخب افراد کا غائب ہونا ملکی تاریخ کا انوکھا واقعہ ہے۔ 

انہوں نے کہا کہ جماعت اسلامی عوام کے حقوق کےلیے کسی قربانی سے دریغ نہیں کرے گی۔