کاروباری اور صنعتی شعبے مسائل کے حل کیلئے مصنوعی ذہانت کا حل اپنائے:صدر

اسلام آباد: صدر ڈاکٹرعارف علوی نے پاکستان کے کاروباری اورصنعتی شعبے پرزوردیاہے کہ وہ اپنے مسائل حل کرنے اور اپنی کارکردگی اورپیداواری صلاحیت بڑھانے کے لئے مصنوعی ذہانت پر مبنی حل اپنائے۔

انہوں نے اسلام آباد میں آرٹیفیشل انٹیلی جنس ایجوکیشن فائونڈیشن کے وفد سے گفتگو کرتے ہوئے کہا کہ انفارمیشن ٹیکنالوجی کی غیر معمولی ترقی نے کاروبار اور صنعت کاروں کے لئے صحت، تعلیم، کاروبار اور صنعت جیسے مختلف شعبوں میں نئے مواقع پیدا کئے ہیں۔

صدر نے کہا کہ پاکستان کی آئی ٹی کمپنیوں کو اِن اواقع سے بھرپور فائدہ حاصل کرنے کے لئے عالمگیر نکتہ نظر کو اپنانا چاہیے۔

ڈاکٹرعارف علوی نے آئی ٹی کمپنیوں کے لئے مقامی اوربین الاقوامی دونوں سطح پر تعلیمی اداروں اور صنعتوں کے ساتھ شراکت داری کو فروغ دینے کی ضرورت پر زور دیا۔

انہوں نے کہاکہ تعلیمی اداروں اورصنعت کے شراکت داروں کے درمیان مضبوط اور باہمی طورپر فائدہ مندشراکت داری سے اہم اقتصادی اورتکنیکی سنگ میل تک پہنچنے میں مددملے گی۔