9 مئی واقعات میں مجھ پر 13 دفعات لگائی گئیں لیکن ایک بھی ثابت نہ کرسکے، شاہ محمود قریشی

ملتان: تحریک انصاف کے وائس چیئرمین شاہ محمودقریشی نے کہا ہے کہ 9 مئی واقعات میں مجھ پر 13 دفعات لگائی گئیں لیکن ایک بھی ثابت نہ کرسکے۔

ملتان سیشن کورٹ کے باہر میڈیا سے گفتگو کرتے ہوئے شاہ محمود قریشی نے کہا کہ مجھ پر ملتان میں من گھڑت 5 کیس درج کیے گئے، ملتان میں موجود ہی نہیں تھا  لہٰذا انتظامیہ میں کچھ تو خوف خدا ہونا چاہیے، میرے گھر کے ملازمین کو تھپڑ مارے گئے۔

انہوں نے کہا کہ اسلام آباد میں گرفتار ہوا اڈیالہ جیل گیا اور مقدمات ملتان میں درج ہوگئے، ان جھوٹے مقدمات سے انتظامیہ کی ساکھ متاثر ہوئی ہے، عدالت نے میری ضمانت قبل از گرفتاری منظور کی ہے، میرا ضمیر مطمئن ہے میرے ہاتھ صاف ہیں۔

شاہ شمس تبریز کا آستانہ ہے وہاں اللہ سے دعا کروں گا کہ اللہ کڑا امتحان ہے اس میں سرخرو فرما دے۔