فلسطین میں یہودی بستیوں کی تعمیر جاری رکھیں گے،اسرائیلی وزیر خزانہ

اسرائیلی وزیر خزانہ بیزلیل سموٹریچ نے کہا ہے کہ فلسطینیوں کی زیر قبضہ اراضی پر یہودی بستیوں کو مضبوط کرنے کی پالیسی جاری ہے۔ انہوں نے مزید بستیوں کی تعمیر جاری رکھنے کا کہا ہے۔

غیر ملکی خبر رساں ایجنسی کے مطابق اپنے بیان میں وزیر خزانہ ے کہا ہم بستیوں کی تعمیر جاری رکھیں گے اور ان بستیوں کی زمین پر اسرائیلی کنٹرول کو مضبوط کریں گے۔ سموٹریچ وزارت خزانہ کے ساتھ سکیورٹی کے فرائض بھی سرانجام دیتے ہیں۔

اسرائیل کی قومی مذہبی حکومت نے آج یہودی بستیوں کی توسیع کو روکنے کے لیے امریکی دباؤ کے باوجود مقبوضہ مغربی کنارے میں ہزاروں عمارتوں کے اجازت نامے منظور کرنے کے منصوبے تیار کرلیے۔ یاد رہے واشنگٹن ان منصوبوں کو امن کی راہ میں رکاوٹ قرار دیتا ہے۔

دوسری جانب فلسطینی اتھارٹی نے اسرائیل کے اس فیصلے پر ردعمل ظاہر کرتے ہوئے اس بات پر زور دیا ہے کہ وہ اسرائیل کے ساتھ مشترکہ اقتصادی کمیٹی کے اجلاس کا بائیکاٹ کرے گی۔ یہ اجلاس آج پیر کو ہو رہا ہے۔

غزہ کی پٹی پر 2007 سے حکمرانی کرنے والی حماس نے اس اقدام کی مذمت کرتے ہوئے کہا ہے کہ یہ نوآبادیاتی، یہودیت سازی کے منصوبے ہماری سرزمین پر قبضے کو قانونی حیثیت نہیں دے سکتے۔ فلسطینی عوام تمام دستیاب ذرائع سے ان منصوبوں کی مزاحمت کریں گے۔

جنوری 2023 میں اقتدار سنبھالنے کے بعد سے وزیر اعظم نیتن یاہو کے اتحاد نے سات ہزار سے زائد نئے ہاؤسنگ یونٹس کی تعمیر کی منظوری دی ہے جن میں سے زیادہ تر مغربی کنارے میں ہیں