وطن کی محبت، جمہوریت کی بحالی اور عوام کی سر بلندی کے لیے بینظیر بھٹو نے اپنی زندگی قربان کر دی،وزیراعلیٰ سندھ

کراچی: وزیر اعلی ٰسندھ سید مراد علی شاہ نے کہا ہے کہ اپنے وطن کی محبت، جمہوریت کی بحالی اور عوام کی سر بلندی کے لیے شہید جمہوریت محترمہ بینظیر بھٹو نے اپنی زندگی قربان کر دی۔

انہوں نے بدھ کو شہید محترمہ بینظیر بھٹو کی سالگرہ کے موقع پر جاری کردہ اپنے پیغام میں کہا کہ آج کا دن شہید قائد کی قربانی، جدوجہد ، عوام سے لازوال محبت اور جمہوریت کا دن ہے۔

وزیراعلیٰ سندھ نے شہید محترمہ بینظیر بھٹو کے جنم دن پر ان کی فیملی اور کارکنوں کو مبارکباد دیتے ہوئے کہا کہ شہید جمہوریت عظیم قائد شہید ذوالفقار علی بھٹو اورعظیم رہنما بیگم نصرت بھٹو کی عظیم بیٹی تھیں۔ان کا کہنا تھا کہ محترمہ بینظیر بھٹو کو بہادری، جدوجہد اور شہادت اپنے عظیم والد سے ورثے میں ملی۔