اقوام متحدہ کی مقبوضہ فلسطینی علاقے میں جاری تشدد اور جانوں کے ضیاع کی مذمت

اقوام متحدہ: اقوام متحدہ کے سیکرٹری جنرل انٹونیو گوتریش نے مقبوضہ فلسطینی علاقے میں جاری تشدد اور جانوں کے ضیاع کی مذمت کی ہے۔چینی خبر رساں ادارے نے اقوام متحدہ کے سربراہ کے نائب ترجمان فرحان حق کے بیان کے حوالے سے بتایا کہ تناؤ کو کم کرنا اور مزید بڑھنے سے روکنا بہت ضروری ہے۔

انہوں نے کہا کہ اسرائیل کو بین الاقوامی انسانی قانون کے تحت اپنی ذمہ داریوں کی پاسداری کرنی چاہیے،طاقت کا متناسب استعمال اور فوجی کارروائیوں کے دوران عام شہریوں کی حفاظت کے لیے تمام ممکنہ احتیاطی تدابیر اختیار کرنی چاہئیں۔ انہوں نے کہا کہ بامعنی سیاسی عمل کی طرف واپسی اور فلسطینی علاقوں سے قبضے کا خاتمہ ہی اس تنازعے کا حل ہے۔