دبئی میں آصف علی زرداری اور مسلم لیگ ن کے رہنماؤں کی ملاقات پر مولانا فضل الرحمٰن کا اعتراض

مولانا فضل الرحمن نے دبئی میں آصف علی زرداری اور ن لیگ کے رہنماؤں کی ملاقات پر اعتراض اٹھا دیا۔ مسلم لیگ ن کو پی ڈی ایم کو اعتماد میں لے کر دبئی میں ملاقات کرنی چاہیے تھی۔ دبئی ملاقات میں اب تک پی ڈی ایم کو اعتماد میں نہیں لیا گیا۔

سینیئر صحافیوں سے بات چیت کرتے ہوئےمولانا فضل الرحمٰن نے کہا کہ یہ سوال پی ڈی ایم میں موجود ہے کہ مسلم لیگ ن نے اب تک اتحاد میں شامل جماعتوں کو دبئی میٹنگ کے حوالے سے اعتماد میں کیوں نہیں لیا۔

انہوں نے کہا کہ  دبئی مذاکرات اچانک نہیں بلکہ منصوبہ بندی سے ہوئے اس لیے سب کواعتماد  میں لیا جانا چاہیے تھا۔ سینیئر سیاستدان نے کہا کہ پیپلزپارٹی پی ڈی ایم کاحصہ نہیں اس لیے اس سے دبئی مذاکرات کے بارے میں نہیں پوچھ سکتے۔ پی ڈی ایم کے مستقبل کے حوالے سے انہوں نے کہا کہ پی ڈی ایم ایک تحریک تھی جس کی اب ضرورت باقی نہیں رہی،پی ڈی ایم انتخابیی اتحاد نہیں ہے۔

آئندہ الیکشن  کے حوالے سے اظہارخیال کرتے ہوئے سربراہ  جے یو آئی ( ف ) کا کہنا تھا کہ عام انتخابات وقت پر ہوں گے، انہوں نے کہا کہ ایک ماہ میں مرکز،  سندھ اوربلوچستان میں نگران حکومتیں قائم  ہوجائیں گی،اگست میں ہم چلے جائیں گے،الیکشن کرانا نگراں حکومت کا کام ہو گا۔

2018  کے انتخابات کے حوالے سے  مزید اظہار خیال کرتے ہوئے مولانا فضل الرحمٰن نے کہا کہ ہم 2018 اتخابات کے بعد اسمبلیوں کی رکنیت کاحلف نہیں اٹھاناچاہتے تھے تاہم اپوزیشن جماعتوں کی وجہ سے ایساکرنا پڑا۔ ہمارے لیے بے شمارمشکلات پیداکی گئیں مگر ہم نے تحمل سے کام لیا۔