پی ٹی آئی کے منحرف رکن حاجی گلبر خان گلگت بلتستان کے نئے وزیراعلیٰ منتخب

 پی ٹی آئی کے منحرف رکن حاجی گلبر خان گلگت بلتستان کے نئے وزیراعلیٰ منتخب ہو گئے۔ حاجی گلبر خان کو پیپلز پارٹی،مسلم لیگ ن اور جے یوآئی کی حمایت حاصل تھی۔

پی ٹی آئی ہم خیال گروپ نے انتخاب کے بائیکاٹ کا اعلان کیا تھا جس کے بعد حاجی گلبر بلامقابلہ انتخاب جیت گئے تھے۔ انہیں گلگت بلتستان اسمبلی کے آج ہونے والے اجلاس میں موجود 19 ارکان نے ووٹ دئیے۔

حاجی گلبر خان 2020 کے انتخابات میں پی ٹی آئی کی ٹکٹ پر کامیاب ہوئےاور وزیرصحت رہے، نو منتخب وزیراعلیٰ گلگت بلتستان کے حلقہ 18 دیامر 3 تانگیر سے منتخب ہوئے تھے

واضح رہے کہ چیف کورٹ کے 3 رکنی بنچ نے جعلی ڈگری کیس میں وزیراعلیٰ جی بی خالد خورشید کو نا اہل قرار دیا تھا جس کے بعد نئے وزیر اعلیٰ کے لیے پاکستان تحریک انصاف کی جانب سے راجا اعظم، ن لیگ کی جانب سے انجینئر محمد انور کے علاوہ امجد ایڈووکیٹ نے وزیراعلیٰ کے انتخاب کے لیے کاغذات نامزدگی جمع کرائے تھے۔