جڑواں شہروں میں صبح سویرے تیز بارش کے باعث سیلابی صورتحال پیدا ہوگئی

اسلام آباد: صبح سویرے ہونے والی بارش سے راولپنڈی اور اسلام آباد کے کئی علاقے زیرآب آگئے۔

محکمہ موسمیات کے مطابق رات گئے سے راولپنڈی میں 190 ملی میٹر بارش ریکارڈ کی گئی جب کہ گولڑہ میں 102 ملی میٹر، چکلالہ میں 72 اور شمس آباد میں 188 ملی میٹر بارش ریکارڈ کی گئی۔

شدید بارش کے بعد نالہ لائی میں کٹاریاں میں پانی کی سطح 16 فٹ اور گوالمنڈی میں 13 فٹ تک پہنچ گئی، شہر کے مختلف علاقوں کا دورہ کرنے کے بعد کمشنر راولپنڈی نے کہا کہ نشیبی علاقوں میں نکاسی آب کے لیے مشینری کے ساتھ ٹیمیں موجود ہیں۔

کمشنر راولپنڈی نے کہا کہ تمام محکمے ہائی الرٹ ہیں۔ شہر میں رین ایمرجنسی نافذ ہے اور ہسپتالوں کی ایمرجنسی کو بھی الرٹ کر دیا گیا ہے۔

ریسکیو ٹیموں کے ترجمان کا کہنا ہے کہ شہروں میں بارش کے بعد ریسکیو اہلکاروں کو الرٹ کر دیا گیا ہے۔

ترجمان کے مطابق نالہ لئی کے اطراف ریسکیو اہلکار تعینات کر دیے گئے ہیں۔ کٹاریاں، گوالمنڈی، سواں پل اور دیگر نشیبی علاقوں میں ٹیمیں موجود ہیں۔

ریسکیو ترجمان کا کہنا ہے کہ ٹیم ہر قسم کے حالات سے نمٹنے کے لیے تیار ہے، کسی بھی ہنگامی صورت حال میں فوری طور پر ریسکیو ہیلپ لائن پر اطلاع دیں۔

محکمہ موسمیات کا کہنا ہے کہ آج (بدھ) اسلام آباد، پنجاب، خیبرپختونخوا، بلوچستان اور کشمیر میں گرج چمک کے ساتھ بارش کا امکان ہے۔

محکمہ موسمیات نے سندھ میں میرپورخاص، سکھر، لاڑکانہ، جیکب آباد، تھرپارکر، خیرپور اور گردونواح میں بادل چھائے رہنے کا امکان ظاہر کردیا۔