حکومت اسٹیٹ بینک آف پاکستان سے نیا قرض نہیں لے گی، آئی ایم ایف

واشنگٹن ڈی سی: انٹرنیشنل مانیٹری فنڈ (آئی ایم ایف) کے مطابق رواں مالی سال پاکستان میں مہنگائی کی شرح 25.9 فیصد رہنے کا امکان ہے۔

آئی ایم ایف کے مطابق پاکستان کی معاشی ترقی کی شرح 2.5 فیصد رہ سکتی ہے، مالی سال 2024 میں بیروزگاری کی شرح 08 فیصد تک کم ہو سکتی ہے۔

آئی ایم ایف نے بتایا کہ پروگرام کے اختتام تک درآمدی پابندیاں ختم کر دی جائیں گی۔ پاکستان کا مالیاتی خسارہ معیشت کا 7.5 فیصد رہنے کا امکان ہے۔

آئی ایم ایف کے مطابق پاکستان کے پروگرام پر عملدرآمد کی نگرانی کی جائے گی، حکومت اسٹیٹ بینک آف پاکستان (ایس بی پی) سے نیا قرض نہیں لے گی۔

آئی ایم ایف نے بتایا کہ آئندہ سال پیٹرولیم لیوی ایک ہزار ارب روپے سے تجاوز کرنے کا امکان ہے اور پاکستان کو دسمبر 2023 تک 12 ارب ڈالر کے کثیر اور دو طرفہ قرضے ملنے کا امکان ہے۔

پاکستان کو مالیاتی خسارہ کم کرنے کے لیے مانیٹری پالیسی مزید سخت کرنے کی ہدایت کی گئی ہے، اس لیے صوبوں کو سرپلس بجٹ دینا ہوگا۔

پاکستان اور آئی ایم ایف معاہدے کی تفصیلات کے مطابق پاکستان نے آئی ایم ایف کو توانائی پر سبسڈی کم کرنے اور آمدن بڑھانے کے علاوہ درآمدات پر سے پابندی اٹھانے کی یقین دہانی کرائی ہے۔

پاکستان نے آئی ایم ایف سے تنخواہ اور پنشن کے اخراجات کم کرنے اور بینظیر انکم سپورٹ پروگرام کے لیے فنڈز بڑھانے کا بھی وعدہ کیا ہے۔

پاکستان کی جانب سے یقین دہانی کرائی گئی ہے کہ قومی کھاتوں کی سہ ماہی رپورٹ سمیت سرکاری اداروں کی مانیٹرنگ رپورٹ جاری کی جائے گی۔