قرآن نذر آتش کرنے پر مظاہرین نے عراق میں سویڈن سفارت خانے کو آگ لگا دی

سویڈن میں قرآن مجید کے نسخوں کو نذر آتش کرنے پر سینکڑوں مشتعل مظاہرین نے عراق میں سویڈن کے سفارت خانے پر دھاوا بول کرعمارت کو آگ لگا دی۔

درجنوں افراد سفارت خانے کے احاطے کے ارد گرد لگی باڑ پر چڑھ گئے اور کچھ نے سامنے والے گیٹ کو توڑنے کی کوشش کی۔ سکیورٹی فورسز نے مظاہرین کو منتشر کرنے کے لیے واٹر کینن اور لاٹھیوں کا استعمال کیا جبکہ مظاہرین نے سیکورٹی فورسز پر پتھراؤ کیا۔

سویڈن کی وزارت خارجہ نے  بغداد میں اپنے سفارت خانے کو نذر آتش کرنے کی مذمت کی اور عراقی حکام کو سفارتی مشنوں اور ان کے ملازمین کے تحفظ کا ذمہ دار ٹھہرایا۔

عراقی وزارت خارجہ نے سویڈن کے سفارت خانے کو نذر آتش کرنے کی مذمت کرتے ہوئے کہا کہ سفارت خانوں اور سفارت کاروں پر حملے ویانا کنونشن کی سنگین خلاف ورزی ہے اور سفارت کاروں اور بین الاقوامی اداروں کے عملے پر ہونے والے تمام حملوں کو مسترد کرنے پر زور دیا۔

وزارت خارجہ کے ترجمان کا کہنا تھا کہ عراقی حکومت نے مجاز سیکورٹی حکام کو فوری تحقیقات کرنے ، ذمہ داروں کی شناخت کرنے اور انہیں قانون کے مطابق سزا دینے کا حکم دیا ہے