نگران حکومت کے اختیارات میں اضافہ الیکشن کو مشکوک بنارہا ہے،شیخ رشید

عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے کہا ہے کہ نگران حکومت کے اختیارات کو طاقتور بنانے کے لیے ترمیم الیکشن کو ہی مشکوک بنارہی ہیں۔ سیکشن 203 میں ترمیم آئین اور قانون اور صاف الیکشن کی موت ہوگی۔

اپنے ٹویٹ میں شیخ رشید کا کہنا تھا کہ اسحاق ڈار کو نگران وزیراعظم بنانا نواز شریف کا فیصلہ ہے تاکہ اپنی من مانی اور دھاندلی کو جاری رکھ سکیں۔ نگران حکومت کا سیٹ اپ طویل بھی ہوسکتا ہے۔  پیپلز پارٹی سے ہاتھ ہونے جا رہا ہے اور اتحادیوں میں دال بٹنے والی ہے ایسا نگران وزیراعظم بھی آسکتا ہے جو سیاسی حلقوں میں ابھی زیر بحث نہ ہو۔عدلیہ بھی اگست کے مہینے میں اہم فیصلے کرے گی ستمبر ستمگر ہوگا اور سیاست شدید تنازعات میں بھی الجھ سکتی ہے۔

نگران حکومت کے اختیارات کو طاقتور بنانے کے لیے ترمیم الیکشن کی شروعات کو ہی مشکوک بنارہی ہیں اسحاق ڈار کو نگران وزیراعظم بنانا نواز شریف کا فیصلہ ہے تاکہ اپنی من مانی اور دھاندھلی کو جاری رکھ سکیں نگران حکومت کا سیٹ اپ طویل بھی ہوسکتا ہے سیکشن 203 میں ترمیم آئین اور قانون اور صاف…

— Sheikh Rashid Ahmed (@ShkhRasheed) July 26, 2023

سابق وفاقی وزیر نے مزید کہا کہ نگران وزیراعظم کا فیصلہ ساری سیاسی گانٹھیں کھول دے گا اور آئندہ آنے والی سیاست کا تعین بھی کردے گا آنے والے 2 ہفتےسیاست کے اہم ہوں گے اور ساری اکھاڑ پچھاڑ عوام کےسامنے آجائے گی اس سارے کھیل میں عوام کو بے خبر رکھا جا رہا ہے جبکہ آخری فیصلہ باشعور عوام ہی کرے گی وقت ثابت کرے گا کہ عوام کو جاہل سمجھنے والے خود بہت بڑے جاہل تھے

انہوں نے کہا کہ پیپلز پارٹی اور ن لیگ ایک ہفتے میں آمنے سامنے ہوں گے بہت ساری امیدیں دھری کی دھری رہ جائیں گی اور سندھ بھی پیپلز پارٹی کے لیے اتنا آسان نہیں ہوگا۔ الیکشن سے پہلے ایک نیا سیاسی جوڑتوڑ سامنے آئے گا جو اتحادیوں کی سیاست کا نقشہ بدل دے گا جب اتحادی اپنے اپنے انتخابی نشان پے الیکشن لڑیں گے تو اتحادیوں میں فاصلے بڑھیں گے اور ان کےووٹ بھی تقسیم ہوں گے۔