خیبر اور جنوبی وزیرستان میں فوجی آپریشن، 3دہشت گردہلاک

خیبر اور جنوبی وزیرستان کے اضلاع میں سکیورٹی فورسز نے کامیاب کارروائیاں کرتے ہوئے 3دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کی طرف سے جاری بیان کے مطابق 27 جولائی کو خیبر ضلع کے عمومی علاقے باغ میں  افواج اور دہشت گردوں کے درمیان فائرنگ کا تبادلہ ہوا۔ فوجی جوانوں نے مؤثر طریقے سے دہشت گردوں کے ٹھکانے کا سراغ لگایا جس کے نتیجے میں 1 دہشت گرد مارا گیا۔

ہلاک دہشت گرد سے اسلحہ اور گولہ بارود بھی برآمد ہوا ہے۔ اسی طرح 28 جولائی کو جنوبی وزیرستان کے علاقے گومل زام میں ہمارے جوانوں اور دہشت گردوں کے درمیان ایک اور شدید جھڑپ ہوئی جس میں دو دہشت گرد مارے گئے۔

مارے گئے دہشت گرد سکیورٹی فورسز کے خلاف دہشت گردانہ کارروائیوں کے ساتھ ساتھ معصوم شہریوں کے قتل میں بھی ملوث رہ چکے ہیں۔ علاقے میں کلیئرنس آپریشن جا ری ہے تاکہ علاقے میں موجود دیگر کسی بھی دہشت گرد کو ختم کیا جا سکے۔