فلسطینی اپنی سرزمین میں رہتے ہیں، انہیں آزاد ریاست کے قیام کا حق ہے، روسی صدر

روس کے صدر ولادیمیر پوتین نے کہا ہے کہ اسرائیل کی طرف سے فلسطینیوں کو مصر چھوڑنے کا مطالبہ امن کے لیے نقصان دہ ثابت ہوگا،فلسطینی اپنی سرزمین پر رہتے ہیں۔

غیر ملکی خبر رساں ایجنسی کے مطابق  پوتین نے کہا کہ میرے لیے کوئی اندازہ لگانا مشکل ہے۔ فلسطینی جس سرزمین پر رہتے ہیں وہ تاریخی طور پر ان کی اپنی سرزمین ہے۔ فلسطینیوں کو اپنی ایک آزاد ریاست کے قیام کا حق ہے۔

اس سے قبل روسی صدر نے امریکا پر الزام لگایا تھا کہ وہ فلسطینی اسرائیل تنازعے کے حل کے لیے متوازن عمل سے گریز کر رہا ہے اور بنیادی مسائل کو حل کیے بغیر معاملات کو اپنے ہاتھ میں لینے کی کوشش کر رہا ہے۔

پوتین نے اسرائیل میں تشدد کو خوفناک قرار دیتے ہوئے کہا کہ فلسطینی ریاست کے قیام جیسے مسائل کو حل کیے بغیر تنازعہ حل نہیں ہو سکتا۔

روسی صدر نے اس بات پر بھی زور دیا کہ اسرائیل کی آباد کاری کی پالیسی مشرق وسطیٰ میں تشدد کے بھڑکنے کی ایک بڑی وجہ ہے۔

خیال رہےکہ روس کی طرف سے یہ بیان ایک ایسے وقت میں سامنے آیا ہے جب دوسری طرف فلسطین کے علاقے غزہ کی پٹی پر اسرائیلی فوج وحشیانہ فضائی حملے کررہی ہے جس میں بڑی تعداد میں شہریوں کی اموات ہو رہی ہیں۔