غزہ میں اسرائیلی جارحیت میں اضافے کی صورت میں ہمارے اتحادی جواب دے سکتے ہیں، ایران

بغداد: ایرانی وزیر خارجہ حسین امیر عبداللہیان نے کہا ہے کہ حماس کے ساتھ جنگ میں ایک نئے محاذ کے کھلنے کا دارومدار غزہ میں اسرائیلی کارروائیوں پر منحصر ہے۔

فرانسیسی خبر رساں ادارے کی رپورٹ کے مطابق عراقی وزیر اعظم محمد السودانی کے ساتھ ملاقات کے دوران ایرانی وزیر خارجہ نے کہا کہ کچھ ممالک کے حکام نے ہم سے رابطہ کر کے خطے میں اسرائیل کے خلاف ایک نئے محاذ کے کھولے جانے کے امکانات کے بارے میں پوچھا ہے لیکن ہم نے ان کو بتایا ہے کہ سب کچھ غزہ میں اسرائیلی حکومت کے اقدامات پر منحصر ہے۔

اس وقت بھی اسرائیل کے جرائم جاری ہیں اور خطے میں کوئی بھی ہم سے نئے محاذ کھولنے کے لئے اجازت نہیں مانگے گا۔ بعد ازاں لبنان کے دارالحکومت بیروت کے ہوائی اڈے پر صحافیوں سے بات کرتے ہوئے ایرانی وزیر خارجہ نے کہا کہ غزہ میں اسرائیلی جارحیت میں اضافے کی صورت میں ایران کے علاقائی اتحادی جواب دے سکتے ہیں۔

انہوں نے مزید کہا کہ فلسطینیوں اور غزہ کے خلاف جنگی جرائم جاری رہنے کی صورت میں ایران کے علاقائی اتحادی ممالک کی طرف سے جواب دیا جائے گا۔ واضح رہے کہ اسرائیل فلسطینی تنازعے میں حزب اللہ کی مداخلت کی صورت میں امریکا کو لبنان کے ساتھ اسرائیل کی شمالی سرحد پر دوسرا محاذ کھلنے کا خدشہ ہے ۔