رہنما تحریک انصاف فرخ حبیب کی اہلیہ کا شوہرکی بازیابی کے لیے چیف جسٹس کو خط

پاکستان تحریک انصاف کے رہنما فرخ حبیب کی گمشدگی کے معاملے پر ان کی اہلیہ نے چیف جسٹس قاضی فائز عیسیٰ کو خط لکھ دیا ہے۔

فرخ حبیب کی اہلیہ نے اپنے شوہر کی بازیابی کیلئے چیف جسٹس آف پاکستان کے نام خط میں فرخ حبیب کی گمشدگی کا فوری نوٹس لینے اور جلد از جلد بازیابی یقینی بنانے کی استدعا کی۔

خط میں انہوں نے لکھا کہ فرخ حبیب کی بازیابی کیلئے لاہور ہائیکورٹ میں حبسِ بے جا کی درخواست دائر کی گئی،انہوں نے کہاکہ فرخ حبیب باریابی کےلئے لاہور ہائی کورٹ میں زیر التوا کیس میں آئی جی پنجاب کو حکم کے باوجود کوئی پیش رفت نہیں ہوئی۔  وہ سابقہ رکن قومی اسمبلی، قانون کے پابند اور قابل احترام شہری ہیں۔

فرخ حبیب کی اہلیہ کا کہنا تھا کہ عدالتی حکم کے باوجود فرخ حبیب کو کسی بھی عدالت میں پیش نہیں کیا جارہا، فرخ حبیب کے بارے میں معلومات نہ ہونے پر ہم تشویش کا شکار ہیں۔

اہلیہ فرخ حبیب نے خط میں خدشہ ظاہر کیا کہ میرے شوہر کو اپنی سیاسی وابستگی تبدیل کرنے پر مجبورکیا جارہاہے،مزید کہا کہ خدشہ ہے میرے شوہر کو شدید تشدد اور ٹارچر کا نشانہ بنایا جا رہا ہے۔