ملک کے مختلف شہروں میں بارش، آمدموسم سرما کی اطلاع دے رہی ہے

لاہور، اسلام آباد: ملک کے مختلف شہروں میں سردی نے دستک دیدی، بارش برسنے سے موسم خوشگوار ہوگیا۔

صوبائی دارالحکومت لاہور میں علی الصبح سے ہی گہرے بادل چھائے ہوئے ہیں، شہر کے مختلف علاقوں ایبٹ روڈ، شملہ پہاڑی، گڑھی شاہو، مال روڈ، گلبرگ، کرشن نگر، بند روڈ، گلشن راوی سمیت دیگر علاقوں میں بوندا باندی سے موسم انتہائی خوشگوار ہوگیا ہے۔

لاہور کے علاوہ پنجاب کے دیگر شہروں فیصل آباد، چنیوٹ، ساہیوال، شیخوپورہ، قصور، کاہنہ، اوکاڑہ، بصیر پور، پتوکی، رینالہ خورد میں بارش ہوئی جب کہ بھوانہ، شرقپور، لالیاں اور دیگر شہروں میں بھی موسم سرما کا استقبال کیا گیا۔

محکمہ موسمیات کا کہنا ہے کہ بارش کا سلسلہ کل بھی جاری رہے گا۔