بینکوں کے ڈیپازٹس، مختصر مدت کے قرضوں اور سرمایہ کاری میں نومبر کے دوران عمومی اضافے کا رجحان

اسلام آباد: بینکوں کے ڈیپازٹس، مختصر مدت کے قرضوں اور سرمایہ کاری میں نومبر کے دوران عمومی اضافے کا رجحان دیکھنے میں آیا ہے۔

سٹیٹ بینک کی جانب سے جاری کردہ اعدادوشمار کے مطابق نومبر 2023 کے اختتام پر بینکوں کے ڈیپازٹس کا حجم 26798 ارب روپے ریکارڈ کیا گیا جو گزشتہ سال نومبر کے مقابلے میں 17.9 فیصد اور اکتوبر کے مقابلے میں 1.5 فیصد زیادہ ہے۔ گزشتہ سال نومبر میں بینکوں کے ڈیپازٹس کا حجم 22732 ارب روپے جبکہ اکتوبر 2023 میں 26398 ارب روپے ریکارڈ کیا گیا تھا۔

اعدادوشمار کے مطابق نومبر 2023 کے اختتام پر بینکوں کے مختصر مدت کے قرضوں کا حجم 11964 ارب روپے ریکار ڈ کیا گیا جو گزشتہ سال نومبر کے مقابلے میں 7.9 فیصد اور اکتوبر کے مقابلے میں 0.6 فیصد زیادہ ہے۔

گزشتہ سال نومبر میں بینکوں کے مختصر مدت کے قرضوں کا حجم 11092 اور اکتوبر 2023 میں 11898 ارب روپے ریکارڈ کیا گیا تھا۔ اعدادوشمار کے مطابق نومبر 2023 کے اختتام پر بینکوں کی سرمایہ کاری (سٹارٹ) کا حجم 24587 ارب روپے ریکارڈ کیاگیا جو گزشتہ سال نومبر کے مقابلے میں 33 فیصد اور اکتوبر کے مقابلے میں 5.8 فیصد زیادہ ہے۔