افغانستان ٹی ٹی پی قیادت کو پاکستان کے حوالے کرے ،ممتاز زہرہ بلوچ

دفتر خارجہ کی ترجمان ممتاززہرہ بلوچ نے افغان حکام کو مخاطب کرتے ہوئے کہا  کہ دہشت گردوں کے کمانڈرز بالخصوص تحریک طالبان پاکستان کے کمانڈرز کو پاکستان کے حوالے کریں جو پاکستان میں دہشت گردی کی سرگرمیوں میں ملوث ہیں۔

 انہوں نے  کہا کہ پاکستان ان عناصر کےخلاف ملکی قوانین کےمطابق کارروائی کرے گا ۔انہوں نے کہا کہ ہمارے پاس ان کےخلاف کافی شواہد موجود ہیں ، انہوں  نے کہا کہ سیکرٹری خارجہ نے گزشتہ روز افغان ناظم الامور کو ڈیرہ اسماعیل خان کے حالیہ دہشت گرد حملے پر احتجاجی مراسلہ حوالے کیاہے۔

بھارتی سپریم کورٹ کے فیصلے جس میں اس نے غیر قانونی زیر قبضہ جموں وکشمیر کی خصوصی حیثیت کومسخ کرنے کے مودی حکومت کے فیصلے کی توثیق کی ہے کےسوال کےجواب میں ترجمان نےکہا کہ اس فیصلے کی کوئی قانونی حیثیت نہیں ہےاور پاکستان نے اس کو مسترد کردیا ہے ،  انہوں نےکہاکہ بھارتی سپریم کورٹ کو عالمی سطح پر تسلیم شدہ متنازعہ خطے  جموں وکشمیر پر فیصلہ کرنے کا کوئی اختیار نہیں ہے۔

 انہوں نےکہا کہ بھارتی مہم کے پس پردہ محرکات بالکل واضح ہیں ، انہوں نے کہا کہ دنیا کا کوئی ملک مقبوضہ جموں و کشمیر کوبھارت کا اٹوٹ انگ تسلیم نہیں کرتا ،  انہوں نے کہا کہ جہاں تک اس سوچی سمجھی مہم کا تعلق ہے اس کا مقصد کشمیریوں کو ان کی اپنی سرزمین پر اقلیت میں تبدیل کرنا ہے اور کشمیری عوام اور پاکستان اس مسئلے کے بنیادی فریق ہیں جنہیں بھارت نے کبھی تسلیم نہیں کیا۔

 ترجمان نے کہا کہ پاکستان کشمیریوں کو جائز حق خودارادیت ملنے تک عالمی سطح پر ان کےلئے آواز اٹھاتا رہے گا۔

 ترجمان نے کہا کہ پاکستان،بھارت کے ساتھ مذاکرات کےلئے تیار ہے تاہم یہ مذاکرات برابری کی بنیاد پر اور کشمیریوں کے نصب العین پر سمجھوتہ کئے بغیرہوں گے۔

 انہوں نے کہا کہ بھارت کو پاکستان کے ساتھ مذاکرات کےلئے پانچ اگست دوہزار انیس کے غیرقانونی اقدامات منسوخ کرنا ہوں گے۔

 بھارت کے ساتھ جب بھی مذاکرات ہوں گے کشمیر کا تنازعہ سرفہرست رہے گا ۔انہوں نے کہا کہ پاکستان اپنے کشمیری بہن بھائیوں کو کبھی تنہا نہیں چھوڑے گا۔

ممتاز زہرہ بلوچ نے کہا کہ بھارت جنوبی ایشیا  اور دنیا بھر میں قتل اور اغوا کی وارداتوں کامرتکب ہوا ہےاور اس کی جاسوسی اور دہشت گردی کا نیٹ ورک پوری دنیا میں پھیل چکا ہے۔

 کینیڈا میں ایک سکھ رہنما کے قتل اور امریکہ میں ایک سکھ رہنما کے قتل کی سازش کی مذمت کرتے ہوئے ترجمان نےکہا کہ بتدریج لیکن یقیناً بھارت دنیا کے سامنے بے نقاب ہورہا ہے، امریکہ میں سکھ رہنما کے قتل کی سازش ناکام بنادی گئی تھی۔

 انہوں نے کہا کہ دنیا کو بھارت کی کارروائیوں پر نوٹس لینا چاہیے کہ بھارت کا انصاف فراہمی کا نظام محض ایک دکھاوا ہے ۔