کشمیر کے بغیر پاکستان مکمل نہیں ہو سکتا ،انوارلحق کاکڑ

نگران وزیراعظم انوارالحق کاکڑ نے کہا ہے کہ بناوٹی بھارتی پارلیمنٹ یا عدالتوں کی طرف سے کی جانے والی کوئی بھی یکطرفہ کارروائی کشمیریوں کیلئے ناقابل قبول ہوگی کیونکہ کشمیری عوام اس تنازعے کے اہم فریق ہیں ۔

آج(جمعہ) کو مظفرآباد میں میڈیا سے بات کر تے ہوئے انہوں نے یقین دلایاکہ حق خودارادیت کے حصول کیلئے جدوجہد میں پاکستانی قوم کشمیریوں کی مکمل حمایت کریگی۔

انہوں نے کہاکہ تکمیل پاکستان کا تصور مسئلہ کشمیر کے حل کے بغیر ایک خواب ہی رہے گا ۔

وزیراعظم نے کہاکہ کشمیر اقوام متحدہ کی سلامتی کونسل کے ایجنڈے پر ہے اور یہ تنازعہ صرف اقوام متحدہ کے تحت ہونے والی رائے شماری کے ذریعے ہی حل ہوسکتا ہے ۔

ایک سوال کے جواب دیتے ہوئے انوارالحق کاکڑ نے کہاکہ بھارت کشمیری قیادت کو قید کرکے کشمیر میں تحریک آزادی کو نہیں دباسکتا۔

کشمیریوں کے کردار کے حوالے سے ایک سوال کے جواب میں انوارالحق کاکڑ نے کہاکہ بیرون ملک رہائش پذیر کشمیری تنازعہ کشمیر کے منطقی حل کے حوالے سے انتہائی اہم کردارادا کرسکتے ہیں۔

وزیراعظم نے مقبوضہ کشمیر کے عوام کے حوصلے کی تعریف کی جو کہ بھارتی بربریت کا سامنا کررہے ہیں لیکن وہ اپنی جدوجہد آزادی سے پیچھے ہٹنے کو تیار نہیں ہیں۔