الیکشن کمیشن آج ہی شیڈول کا اعلان کرے، سپریم کورٹ

اسلام آباد: سپریم کورٹ آف پاکستان نے جمعہ کے روز ڈسٹرکٹ ریٹرننگ افسران (ڈی آر اوز) اور ریٹرننگ افسران (آر اوز) کی تربیت سے متعلق لاہور ہائی کورٹ (ایل ایچ سی) کے احکامات کو معطل کردیا۔

چیف جسٹس قاضی فائز عیسیٰ کی سربراہی میں سپریم کورٹ کے بنچ نے جمعہ کی رات کو  اس معاملے کی سماعت کرتے ہوئے یہ حکم دیا۔ جسٹس سردار طارق مسعود اور جسٹس سید منصور علی شاہ بھی بینچ میں شامل تھے ۔

سپریم کورٹ نے ای سی پی کو آج الیکشن شیڈول کا اعلان کرنے کی بھی ہدایت کی ، چیف جسٹس قاضی فائز عیسیٰ نے شیڈول کے اعلان میں تاخیر پر شدید تحفظات کا اظہار کرتے ہوئے کہا کہ کوئی تاخیر نہیں ہونی چاہیے۔ ای سی پی نے سپریم کورٹ کو اپنا نوٹیفکیشن واپس لینے کی یقین دہانی بھی کرائی۔ عدالت عظمیٰ نے لاہور ہائیکورٹ کو عمیر نیازی کی درخواست پر مزید کارروائی سے بھی روک دیا۔

بروقت انتخابات کو یقینی بنانے کے لیے الیکشن کمیشن نے سپریم کورٹ میں درخواست دائر کی، جس میں بڑی سیاسی جماعتوں بشمول پاکستان پیپلز پارٹی، استحکام پاکستان پارٹی، پاکستان مسلم لیگ قائد، بلوچستان عوامی پارٹی اور عوامی نیشنل پارٹی نے شمولیت اختیار کی۔ 

مسلم لیگ ن کی ترجمان مریم اورنگزیب نے 8 فروری کو انتخابات کے انعقاد کی اہمیت پر زور دیتے ہوئے غیر یقینی صورتحال کا ذمہ دار پی ٹی آئی کو ٹھہرایا۔ پی ٹی آئی کے سینیٹر بیرسٹر علی ظفر نے کہا کہ پی ٹی آئی  8 فروری کو ہونے والے انتخابات کی حمایت کرتی ہے۔