عالمگیر وبا : دنیا بھر میں متاثرین کی تعداد9 کروڑ 93 لاکھ سےتجاوزکرگئی

تفصیلات کے مطابق دنیا بھر میں کورونا سے اموات  کا سلسلہ  تھم نہیں سکا ،  دنیا بھر میں کورونا سے متاثرہ ممالک کی فہرست میں امریکہ پہلے نمبر پر ہے ۔  امریکہ میں کورونا سے  مسلسل چار روز سے  تین ہزار سے زائد اموات جبکہ 24  گھنٹوں میں ایک لاکھ 72 ہزار سے زائد نئے کیسزرپورٹ ہوچکے ہیں۔ نیویار ک  شہرمیں خواتین اساتذہ کی کوورونا ویکسی نیشن  کا عمل شروع کر دیا گیاہے ۔ دوسری جانب  برطانیہ میں کورونا کیسز میں اضافے کے بعد  17جولائی تک لاک ڈاؤن بڑھا دیا گیا ہے ۔برطانیہ میں گزشتہ 24گھنٹوں کے دوران کورونا سے 1348افراد جان کی بازی ہار گئے ، جبکہ  اموات کی مجموعی تعداد 97 ہزار سےتجاوز کرچکی ہے  ۔ یاد رہے کہ برطانیہ، وائرس کی تیسری اور بدترین لہر کا شکار ہے۔ اس حوالےسے برطانوی وزیراعظم بورس جانسن کاکہنا ہے  کہ اس وقت 54 لاکھ افراد کو دو ویکسینز کی پہلی خوراک دی جاچکی  ہے جبکہ یومیہ 4 لاکھ افراد کو ویکسین دی جارہی ہے۔  

بھارت کورونا کیسز کے اعتبار سے دنیا میں دوسرے نمبر پر  موجود ہے جہاں اموات کی تعداد ایک لاکھ 53 ہزار 376 اور ایک کروڑ 6 لاکھ 55 ہزار سے زائد افراد میں وائرس کی تشخیص ہو چکی ہے۔ برازیل میں کورونا سے ہونے والی اموات کی مجموعی تعداد 2 لاکھ 16 ہزار سے تجاوز کرگئی جبکہ 88 لاکھ سے زائد افراد متاثر ہیں۔ روس میں 36 لاکھ 98 ہزار سے زائد افراد کورونا وائرس سے متاثر ہو چکے ہیں اور اموات کی مجموعی تعداد 68 ہزار سے زائد ہے۔ جرمنی میں ایک روز میں 349، اٹلی میں   488 اورفرانس میں 230افراد ہلاک ہوئے۔ اسپین  میں 26 لاکھ سے زائد افراد متاثر جبکہ اموات کی تعداد  55 ہزارسے تجاوز کرچکی ہیں۔  ناروے میں برطانوی طرز کے کورونا کیس رجسٹر ہونے کے بعد سویڈن نے ناروے کے شہریوں پر ملک میں داخلے پر پابندی لگا دی ہے ۔ دنیا بھر  میں کورونا کے 7 کروڑ 13 لاکھ 67 ہزار سے زائد مریض صحت یاب ہوچکے ہیں  ۔

خیال رہے کہ کورونا وائرس کا پہلا کیس17نومبر 2019 کورجسٹر ہواتھا ۔