مریم نواز پہلی خاتون وزیر اعلیٰ پنجاب منتخب

وزیر اعلیٰ پنجاب کے انتخابات کےلئے ووٹنگ کا عمل مکمل، مریم نواز پہلی خاتون وزیر اعلیٰ پنجاب منتخب ہو گئی۔

پنجاب اسمبلی میں نئے وزیراعلیٰ کے انتخاب کیلئے کارروائی کا آغاز ہوا جبکہ سنی اتحاد کونسل کے اراکین نے ایوان سے دوبارہ واک آؤٹ کر دیا ہے۔

پنجاب اسمبلی کا اجلاس سپیکر ملک احمد خان  نے سنی اتحاد کونسل کے اراکین کے بغیر ہی سیکرٹری کو کارروائی شروع کرنے کی ہدایت کر دی۔

قبل ازیں آدھا گھنٹہ تاخیر سے پنجاب اسمبلی کا اجلاس شروع ہوا تو سیکرٹری اسمبلی کی جانب سے ووٹنگ کا طریقہ کار بتایا گیا اور کہا گیا کہ 5 منٹ کے وقفے کے بعد اسمبلی کے دروازے بند کر دیئے جائیں گے۔

ووٹنگ کا طریقہ کار بتائے جانے کے کچھ دیر بعد ہی سنی اتحاد کونسل کے اراکین نے شور شرابہ شروع کر دیا، جس پر سپیکر ملک احمد خان نے کہا کہ جو کچھ ہوگا آئین کے مطابق ہوگا۔

پنجاب اسمبلی کے اجلاس میں شور شرابہ کے درمیان سنی اتحاد کونسل کے اراکین نے اجلاس سے واک آؤٹ کر دیا۔ سنی اتحاد کونسل کے اراکین نے رانا آفتاب کو بات کی اجازت نہ ملنے پر ایوان سے واک آؤٹ کیا۔