غزہ میں غذائی قلت کے باعث صورتحال انتہائی سنگین ، اقوام متحدہ نے خبر دار کردیا

فلسطینیوں کیلئے اقوام متحدہ کے انسانی امور کے بارے میں رابطہ کار JAMIE MC GOLDRICK نے کہا ہے کہ جنگ زدہ غزہ میں غذائی قلت کے باعث صورتحال انتہائی سنگین ہو چکی ہے۔انہوں نے نیو یارک میں ویڈیو لنک کے ذریعے صحافیوں سے گفتگو میں کہا کہ بچے بھوک سے مر رہے ہیں۔اقوام متحدہ کے انسانی امور کے رابطہ کار نے بحران سے فوری طور پر نمٹنے کی ضرورت پر زور دیا۔

اقوام متحدہ کے ایک ادارے کے سینئر امدادی افسر کی جانب سے خبردار کیا گیا ہے کہ جنگ زدہ غزہ کی ایک چوتھائی آبادی قحط کے دہانے پرپہنچ گئی ہے۔

غیر ملکی ذرائع ابلاغ کے مطابق اقوام متحدہ کے ایک ادارے کے سینئر امدادی افسر راجیش راج سنگھم کی جانب سے اقوام متحدہ کی سیکورٹی کونسل کو آنے والے دنوں میں پٹی کے ممکنہ خطرات سے آگاہ کیا گیا ہے۔

سیکورٹی کونسل کو آگاہ کرتے ہوئے اُن کا کہنا تھا کہ شمالی غزہ میں دو سال سے کم عمر کے ہر چھ بچوں میں سے ایک شدید کمزوری کا شکار ہے۔ افسر نے کہا کہ فلسطینی علاقے کے تمام 22 لاکھ افراد بقاء کے لیے انتہائی ناکافی خوراک کی امداد پر انحصار کر رہے ہیں۔