عالمی مالیاتی فنڈ کا پیٹرول پر 18 فیصد سیلز ٹیکس لگانے کا مطالبہ

عالمی مالیاتی فنڈ(آئی ایم ایف) نے پیٹرول پر 18 فیصد سیلز ٹیکس لگانے کا مطالبہ کردیا۔ جب کہ حکومت نے آئی ایم ایف معاہدے پر عملدرآمد کا آغاز کردیا۔ پیٹرولیم ڈویژن نے گیس کی فراہمی کی ترجیحات پر نظر ثانی کردی۔

آئی ایم ایف نے تجویز دی ہے کہ وفاقی حکومت پیٹرول پر 60 روپے لیوی کے ساتھ اٹھارہ فیصد سیلز ٹیکس لگائے، پیٹرول سمیت تمام اشیا پر سیلز ٹیکس کی چھوٹ ختم کی جائے۔ سیلز ٹیکس کی چھوٹ ختم کرکے ٹیکس آمدنی بڑھائی جائے۔

دوسری طرف پیٹرولیم ڈویژن نے آئی ایم ایف کے معاہدے کے مطابق گیس کی فراہمی کی ترجیحات پر نظر ثانی کرتے ہوئے کیپٹو پاور پلانٹس کو ترجیحی شعبوں کی فہرست سے نکال دیا ہے۔

پیٹرولیم ڈویژن کے ترجمان نے بزنس ریکارڈر کو بتایا کہ اس فیصلے سے حکومت کی جانب سے آئی ایم ایف کے ساتھ معاہدے میں بیان کردہ اقدامات پر عمل درآمد کا آغاز ہوا ہے۔