ضمنی انتخابات،کاغذات کی جانچ پڑتال کے بعدفہرست جاری

ضمنی انتخابات 2024 کے لیے لاہور سے قومی اسمبلی کے ایک، صوبائی اسمبلی کے 4 حلقوں میں کاغذات نامزدگی کی جانچ پڑتال کا عمل مکمل کرلیا گیا۔

لاہور کے قومی اسمبلی کے ایک اور صوبائی اسمبلی کے 4 حلقوں میں کاغذات نامزدگی کی جانچ پڑتال مکمل ہونے کے بعد الیکشن کمیشن نے فہرست جاری کردی۔

الیکشن کمیشن آف پاکستان کی فہرست کے مطابق این اے 119 اور پی پی 164 سے حماد اظہر کے کاغذات نامزدگی مسترد کر دیئے گئے۔

این اے 119 سے علی پرویز، شہزاد فاروق سمیت 12 امیدواروں کے کاغذات نامزدگی منظور جبکہ پی پی 158 سے مونس الٰہی کے کاغذات نامزدگی مسترد کر دیئے گئے۔ پی پی 158 سے اختر حسین، یوسف علی سمیت 27 اور پی پی 149 سے شعیب صدیقی، احسن اکرم سمیت 20 امیدواروں کے کاغذات نامزدگی منظور کر لیے گئے۔

پی پی 147 سے محمد خان مدنی، ماجد ظہور سمیت 19 اور پی پی 164 سے اختر حسین، مرزا جاوید سمیت 27 امیدواروں کے کاغذات نامزدگی منظور کر لیے گئے۔

دوسری جانب اپیلٹ ٹربیونل نے پاکستان مسلم لیگ (ن) کے رہنما خواجہ حبیب الرحمان کے کاغذات نامزدگی مسترد کیے جانے کے خلاف اپیل خارج کردی جب کہ عدالت نے ریٹرننگ افسر کا فیصلہ بھی برقرار رکھا۔ خواجہ حبیب الرحمان نے سینیٹ کی جانب سے کاغذات نامزدگی مسترد کیے جانے کے خلاف اپیل دائر کی تھی۔