آئی ایم ایف سے نئے قرض پروگرام کے معاہدے کے لیے درخواست تیار

انٹرنیشنل مانیٹری فنڈ (آئی ایم ایف) سے قرض کے نئے پروگرام کے معاہدے کے لیے درخواست تیار کر لی گئی ہے۔ایکسٹینڈڈ فنڈ فیسلیٹی اور کلائیمٹ چینج سے متعلق اضافی فنڈ کیلئے درخواستیں کی جائیں گی۔

آئی ایم ایف حکام کو موسمیاتی تبدیلیوں سے نمٹنے کے لیے اقدامات اور مختص بجٹ کے حوالے سے بریفنگ تیار کر لی گئی ہے۔ گورنر اسٹیٹ بینک آف پاکستان (ایس بی پی) اور وزارت خزانہ کے سیکریٹری اجلاس کے دوران آئی ایم ایف حکام کو اقتصادی اشاریوں سے آگاہ کریں گے۔

میڈیا رپورٹس میں وزارت خزانہ کے ذرائع کا حوالہ دیتے ہوئے کہا گیا ہے کہ منیجنگ ڈائریکٹر (ایم ڈی) آئی ایم ایف کے ساتھ مثبت بات چیت کے نتیجے میں آئی ایم ایف کا مشن مذاکرات کے لیے آئندہ ماہ پاکستان پہنچے گا۔ یہ مشن اقتصادی ٹیم کے ساتھ مل کر نئے قرض پروگرام اور آئندہ مالی سال کے بجٹ کی تیاری کے لیے کام کرے گا۔

رپورٹس میں مزید کہا گیا کہ پاکستان کی اقتصادی ٹیم ورلڈ بینک کے حکام سے ملاقات کے دوران فنانسنگ بڑھانے پر بھی بات کرے گی۔