محرم الحرام میں جلسے اور جلوسوں میں ڈرون کے استعمال پر پابندی عائد

حکومت نے ملک بھر میں محرم الحرام کے جلوسوں اور مجالس کے دوران ڈرونز کے استعمال پر پابندی عائد کردی ہے۔

اس بارے میں فیصلہ پیر کے روزاسلام آباد میں وزیرداخلہ محسن نقوی کے زیر صدارت ایک اجلاس میں کیا گیا ، اجلاس میں فیصلہ کیا گیا کہ یکم سے دس محرم کے دوران محرم کے جلوسوں اور مجالس میں ڈرون کیمروں کے استعمال پر پابندی ہوگی۔

تاہم انٹرنیٹ یا موبائل فون سروس معطل کرنے کا فیصلہ سیکورٹی خدشات کا جائزہ لینے کے بعد صوبوں کی مشاورت سے کیا جائیگا۔

وزیرداخلہ نے یقین دلایا کہ وفاقی حکومت امن وامان برقرار رکھنے کیلئے آزاد جموں وکشمیر، گلگت بلتستان اور اسلام آباد سمیت تمام صوبوں کو ہر ممکن تعاون فراہم کریگی۔

متعلقہ انسپکٹرز جنرل آف پولیس اور داخلہ سیکرٹریوںنے اجلاس کو محرم کیلئے سیکورٹی منصوبے سے متعلق بریفنگ دی۔