غزہ میں اسرائیلی فوج کی جارحیت جاری، بمباری سے مزید 18 فلسطینی شہید

اسرائیلی فوج کی غزہ کے علاقے خان یونس میں جارحیت جاری ہے، صہیونی فوج نے خان یونس شہر میں خیموں پر حملہ کر دیا جس کے نتیجے میں 18 فلسطینی زندہ جل کر شہید ہو گئے۔

غیر ملکی ادارے کی رپورٹ کے مطابق اسرائیلی فوج کی جانب سے خان یونس میں سیف زون قرار دیئے گئے علاقے پر بمباری کر دی گئی ، جس کی وجہ سے زیادہ تر ہلاکتیں خیموں میں آگ لگنے اور زندہ جلنے کے باعث ہوئیں۔ اس حملے میں ہلاک ہونے والوں کی تعداد تقریباً18 ہے۔

رپورٹ میں یہ بھی بتایا گیا کہ اسرائیلی فوجی طیاروں نے جبالیہ پناہ گزین کیمپ پر بھی بمبار ی کی جس کے نتیجے میں متعدد ہلاکتوں کی اطلاع ہے، جبکہ اسرائیلی فوج نے  بیت حنون سے بےگھر فلسطینیوں کو بھی انخلا کا حکم دے دیا ہے۔ 

دوسری جانب فلسطینی مزاحمت کاروں نے رفح میں اسرائیلی ٹینکوں کو نشانہ بنایا جب کہ جنوبی لبنان میں اسرائیلی طیاروں نے حزب اللہ کے ٹھکانوں پر فضائی حملہ کیا جس سے ایک حزب اللہ فائٹر مارا گیا۔ 

واضح رہےکہ 7 اکتوبر سے غزہ پر جاری اسرائیلی حملوں میں اب تک تقریباً 40 ہزار فلسطینی شہید ہوچکے ہیں جن میں خواتین اور بچوں کی بڑی تعداد شامل ہے۔